استوطن ابروحي الحزن لمن مشيت
وچوچه بلدلال جرحك
وانه مامش حيل بيه شگد بچيت
يا حنين الله اليزتك سير اعليه و تعال
الليل كله بهم اناطر
بيك شاده يلمدهور بيه بال
وليش تبعد
ترى الگمگم هيبته ابنص الدلال
شح صبرهة الروح چا يمته تمر
المصايب بيه چلت
ولوكت ناعور مرني شلون ما رايد يفر
چا دسير
عيني ذبلت ميت بشفتي الدعااا
انه يم ربك دعيتك
وانته مو الله ونخيتك بلصلااا
اي وحك الما گلتهن ميت و عايش عليك
الخشبه ماتت عيسى ردلهة الحيااا
وانه راگد و انتظر
يوم يوم احسب وتاني گلي شيفيد الصبر
انته نورس من تسافر يعگد لسانه النهر
وانه مثل الليل صاير
شما يضوي النجم بيه ابقه عايز للگمر
وحتى اعذرك
يلكرنفل شوف منهو بگدي حبك
عيني تانت يمته ما يچهبهة طيفك
خاف ربك
انته عايفلك محب طشر اسنينه اعله دربك
انته وينك
جرحي اترف من فراشه التعتنيك وما تجيبك
روحي طفله وجاني عيد وما عرفت شلون اهني
وانه بلبل والحزن خلاني اغني
شگد تعنيت اعله بابك
وعين غربه تصد اليه بين چاي بين فات
ودليل الشيب اخذني وبلدرب صاير ابات
وخاف تنشدني اعله باجر
زين منك كلشي مابيه بغيابك
هنه بس عيوني عميه و گلبي مات
