الچان السبب بيمن يواجه ربّه
غصباً علينا من افترگنه وضليت
حافظ سواليفه ومشيته ودربه
نوگف بعيدين ويطگ بينه الشوگ
بوگفتنه لکن گلبي يشبگ گلبه
مدري شيصبرنه الوكت كله فراگ
وانا الچنت بس يمشي احس بغربه
لا هيه مني واعتذر هاي تهون
ولاهيه منه وچا گلت مو صعبه
بس هيه بهله وناسه مدري شيردون
لارضو نبقه ولارضو بالخطبه
وشما ركض بينه العمر نبقه اعزاز
الشيب يغلبنه ونحب ونغلبه
من چنه نتلاگه آلنده بچفنه يطيح
مثل الصلاه نتلاگه گصه وتربه
ونذوب بالملگه ويضل ينگط ماي
ويطيح كله بحضني بس ماشربه
اليسكر بصوت احبيبه شيفيده الكاس
صح الذنب مرغوب بس مارغبه
گلوله خل يتحمل الجاي يصير
الغثگ يهوه الشمس حته ترطبه
وادريها ماتقنع لچن هيه أعذار
تريد اليحبك بالمفارگ جربه
ولايبقه ساكت وانا اعرف الملچوم
يفطر گلوب الناس حچي الگصبه
گلوله اليحب من صدگ نيته هلال
تنزل گلاده البوسه فوگ الرگبه
گلوله ع النوم الترك عيني وضاع
نجوم السما وي عيوني صارن صحبه
گلوله من يمشي بعدني امشي وياه
مايسمع بواحد يسولف گربه
من حرك چفوفه الهوه يحس بماي
گلوله هاي دموعي طشهن حبّه
گلوله باقي يحبك وماناسيك
شما يرخه حبل الوصل شوگه يضبّه
صح احنه مفترگين بس الله يشوف
الچان السبب بيمن يواجه ربّه
مصطفى المالكي
رد مع اقتباس
