هنا

[فقار الكرخي]

لاتحلم الدنيه ازغر من عيونك!
الدنيه وجوه واشكال وضحك چذاب بس انته بطرگ لونك..
بس انته تفيض من البچي اعله الناس..
كافي تفيض مايك بلل ضنونك.
كافي تعاتب النجمه....الشمس طيرة ذهب حطّت عله عيونك!
ووجهك باعته الضلمه.....
والبعينك تبده وسال
حزن عينك دفو موال!
اخذ كل صوره برموشك وسافر للصبح خيّال،،
واخذ روحك
ضباب الناس يكبر وانته عمر هلال...
انته متاني گذله من الشمس تنباع للحيطان،،
كل ذنبك رفضت تطيح!
اجت غيمه....
بچه وجهك رمل عالريح...
وجزت غيمه.......
ضحك وجهك رمل بالريح......
انته اعله الضباب الضيع رسومك ضواك يصيح
ضواك الباگته الوحشه اعله كل شباچ مد چفه.....
وارسومك الذبلانات مدري بيا جفن تغفه؟
گبل كل ليله بالدخان ترسم وجهك الشفّه!!
ليمته وليلك يبيع البرد للناس...
وتشب وولايتك تدفه،،
السهر بيبان مفتوحه لبچي الوسفه،،
السهر موگد حدر فيّ الجفن يطفه...
وحدر ال اااااه وضلوعك تنام جروح الولايه
جروح اللوم ماينشف نزفهه بضحكة مرايه...
امشي اعله الزعل مادامهم ماشين
وبيبان الملاگه تسدهن حچايه!!
باجر والصدگ يخبط زلال وجوه كلمن چذّب بمايه..
وباچر لو جزو طاريك
حدر كل نجمه توگف عينك مرايه.....







مصطفى الخزاعي

[سمراء من قوم عيسى]

أنتقاء جميل