(خايفة من كُل حاجة)
أنتَ فاكَر لما كُنت بتغنيلي
"والهوى أه منوّ الهوى أه منوّ الهوى سهران الهوى يسقينا الهنى ويقول بالهنى"
كانت الفرحة مش شايلاني كُنت بتقول عني نكدية لما ببكي وانت بتغنيلي !
وبتسكت على طول انا كنت ببكي ساعتها علشان انا كنت بحبك بطريقة انت مش قادر تستوعبها !
كنت حاسه بوجعك .. بتعبك من حُبنا وعارفة أد ايه انت مستحمل علشان تبقى معايا !
كنت عارفة ان تعبك حيتغلب في النهاية واخسرك وتروح مني بعيد خالص وتنتهي حكايتنا ..
لكني كنت فاضله معاك علشان ما اندمش اني فرطت بثانية كنت اقدر ابقى فيها معاك ..في لحظات اشتياقي ليك زي دلوقتي
"يا حبيبي يلا نعيش في عيون الليل ..ونقول للشمس تعالي تعالي بعد سنة مش قبل سنة "
انا كنت بحبك حُب أسطوري .. حب محدش يقدر يفهموّا
هو أنا لسه مش فاهمه ليه وازاي وأمتى ؟
فاكر لما كنت برجع من المدرسة تعبانه وتفضل تتحايل عليا علشان ما اسيبكش وانام ؟
وكنت افضل اقاوم وانام على صوتك . وانت بتسيب أتصال التلفون مفتوح وما بتسكرش !
ولما أصحى قبل الفجر والاقيك لسه صاحي تقولي كنت مستني تصحي !
" في ليلة حب حلوة .. بألف ليلة وليلة ..ألف ليلة وليلة بكُل العمر ..هو العمر أييه غير ليلة ؟؟..زي الليلة "
لسه بفتكر لما مره صحيت وانت كنت بتتكلم معايا .. رغم أنك عارف اني نايمه ..
كُنت ساعتها بتحكيلي حاجات مبتقولهاش وانا صاحيه ! حاجات بتوجع ..
فضلت كاتمة وجعي وبكيت من غير صوت .. تمنيت لو أني حضنتك ساعتها وخففت وجعك ..
"يا حبيبي الي نور السماه ونجومه وقمرُ ..قمرُ وسهرُ وأنت وأنا يا حبيبي أنا ..يا حياتي أنا .. كُلنا ...كُلنا في الحب سوى"
كنت كده بتنهي الاغنية بتاعتك ! بـ حُب ... دايماً بتحاول انك تبعد عن النهايات الي بتبكيني ..
كُنت عارف أن أي كلمة بتأثر فيا وحتى رموشي ساعات بتجرح عينيا .. وببكي من أي صوت يقولي أن ممكن حكايتنا تخلص بفُراق وموت .. !
من بعد الاغاني الي بتغنيها تقولي:-
(أزيكم .. أزي حُبكم ..هو لسه فاضل لينا ولا بقى لغيرنا .. هو أحنا لسه أملكم .. ولا بقينا مش قد أحلامكم )
وتفضل تضحك وانا أقولك
( هو أحنا نقدر نبعد عنكم ؟ مين لينا غيركم ! .. ولو كان لينا حيبقى أنتو ..علشان الدُنيا هي أنتو)
هو كل دا ليه ؟ علشان أحنا اتولدنا ف مكان مش مكانه .. ؟
هو احنا لازم نبقى دموع يا حبيبي ؟ انا كنت فاكرة ان حبنا أمل ..
وان حكايتنا مش حتبقى زعل! مش العكس يا نور عينيّ !
محتاجه صوتك.. لمساتك.. حُضنك..حنيتك عليا .. كل حاجه فيك .. محتاجه أشوفك .. أحس بوجودك وأشم عطرك.. الدُنيا أظلمت أوي من دونك واللهِ .. حاسه أن الموت مش عاوز يفارقني الفترة دي ..
حاسه أنو عاوز يجمعني بيك من بعد عذاب ..
وانا يا حبيبي خايفه اجي معاه وما أشوفكش هناك ..
خايفه يلعب بيه وياخدني بعيد عنك ..
أبعد من دلوقتي ومشوفكش من بعدها ..
علشان الموت مفيهوش أحلام مفيهوش أوهام .. مفهيوش طيفك .. مفهيوش الا العذاب ،
عاوزه نلتقي زي زمان .. نكون خايفين من الناس .. ومن كلامهم ..
نكون فرحانين ب الكم ثانية الي بنشوف بعض فيهم ..
نطير للسما لما نمسك أيد بعض ...
وتقولي أد أيه انتَ سعيد انك بتشوفني واد ايه انك بتحبني منستش نظرتك وانت بتقولي "بتحبيني" أزاي بتتكلم بعنيك ؟ازاي كنا نفهم بعض
انتَ حاجه ..صعب أني افهمها يا حبيبي ..
يمكن هو الحب الي صعب يتفهم مش انت بس ..
كتبت كل ده علشان قلبي حن ... وانا مش قادرة أوقف بينك وبينوّ مش عاوزه أجن .. خد كلموّ .. شوف انت وحشتوّ ليه ؟ من بعد ما هجرتوّ .. وعذبتوّ .. وسبت الأيام تيجي عليه ..
يُتبع
المشاركة الأصلية كتبت بواسطة إدريس
