كانت تكلي (كل قوة تأتي من موت)
وكنت دائماً احاول اتناسى جملتها
لان أني أصلاً كنت أخشى الموت
اخشى أنوّ اموت .. أو يموت احد بحياتي حتى لو ما أحبه
كانت كلما تشوفني تكول جُمل تبقى راسخة بذهني .
,,,
اخر مرة شفتها قبل وفاتها
كان صيف وجو حلو كلش كانت أكو غيوم متناثرة فوكانـه
والشمس ترفد السما بتدرجات اللون الأصفر وكأنها بدت تودعنا
دفوّ تبعه قشعريرة برد غريبة كلش !
نظرت ألها وعيوني دمعت ..
أبتسمتلي وحطت ايدها على رجلي كأنما تطمأني
ملت بعيوني عنها للأرض وأبتسمت
كالت ( اصدق الدموع تلك التي تتبعُها ابتسامة)
ما رفعت راسي خوفاً انو أبجي
كأنما صوتها تعويذة تشتت قوتي وأتزاني ...
مدت أيدها على راسي وقرأت بصوت خافت أية قرأنية
كنت اتسائل شلون قساوة الزمن ما كدرت توخر هل نعومة من أيدها وبعدها مثل الحرير!!
بعد دقائق كالت : لا تكابر على دموعك ! وابجي باللحظة الي تحتاج تبجي
أغسلهن لعيونك من هذا الوجع
انت تريد تضمهن
الي يضمهن ما يبقيهن بعيونة !
العيون مفضوحة .. الكاع هي الي تستر
وادعي الله .. ادعي هو الرحيم الي حيساعدك ويوخر منك كل وجع
ويخفف عنك كل هَم
كلامها كان ينقش ب روحـي
بذاكرتـي .. بقلبـي
كملت وكالت : ترى الناس مو كلها ما تفهم وما تقدر !
اكو ناس تتفهم وجعك .. اكو ناس تعرف انو بعض الاخطاء مالك ذنب بيها
المفروض تفهم انو الدنيا بيها ناس وياك مو بس عليك
(نحنُ من أوجد المشاكل حينما أعطينا مساحة لمسبباتها ونحن من أبقى عليها حينما رمينا بالملامة على المسبب ونسينّا ان هذة أختيارتنا)
المشكلة مو بالناس
المشكلة بينا فكر هيج دائما حاول تغيير من نفسك لانوّ أقربلك واسهلك
ولا تهتم للناس وملامتهم
فكر شلون تتلافى الخطأ ..
باوعتلها وضحكت بوجهي ومسكت خدي
وكالت : كُللهم معرفوا يختارون وخسروا هل القلب الرقيق يا ديّديّ
تعرف أني اكول دائما (اشجع الرجال هم أرقهم قلباً لان الشجاعة رحمة ووقفة حق وفي رقة قلبك أراهما)
.
ودعتها بعد مدة ورجعت لحياتي
مرت الايام وتوفت (الله يرحمها)
فهمت بعد وفاتها
معنى جملتها "كل قوة تأتي من موت"
ما كانت تقصد الموت الي هو فراق الروح عن الجسد
وأنو الموت الي تقصده هو موت الروح اثناء الحياة
وفقدان الاشياء بريقها .. وأن الحياة مملة
لكن الانسان يبقى مبتسم وقوي ويبعث ايجابية لكل الناس الي حوله
فهمت أنوّ هي كانت ميتة من زمان
ان الظروف موتتها ان الي خسرته موتها
وان وجودها كان مجرد جسد يتحرك و يحاول يبعث طمأنينة لكل الناس الي يمرون من يمه
حزنت على حياتها .. فرحت لانها أخيراً قابلت الرب الكريم الي كانت تنتظر لقاءة
,,
اخر جملة كالتها من اخر مرة شفتها
(كثيرون يُغرمون بالسماء ويهيمون بها مُتجاهلين الى اين ستمضي بهم خطواتهم على الأرض )
2012/5/17
.
.
كتبتُها كما اتذكر ..
______
مُذكرة 2019/2/2
رد مع اقتباس
المشاركة الأصلية كتبت بواسطة جنة الروح
