ماهمنه الهوه الماخذنه شيريد
بواهس غيم من تعله المناطيد
اذا ماندري وين اتيه الكلوب
وطن لدموعنه تصير التجاعيد
غشمه.. وما درينه العمر مفضوح
شيبة ادلي شيبه اعله المواليد
شايف لمن حلمك ميت يعيش !
حنه بحسرة الماعدها جف ايد !
هنا ينطفي الليل وتكبر الاخ
ويجي الشامت دمع بعيونه يصيد
بمرسم مانطب .. كون احنه عميان
دهشة اللوحة من تتباوع تريد
ضمينه الصور .. مرود للعيون
بكثر ما عالكحل كالونه يفيد
الكلايد اسرى بس بكيفها تعيش
شكد ما بالعشك خانكهن الجيد
شتسواله الحجل ..يومية مهزوز
لايطرب درب لايدري شيريد
بدينه العمر جن محبرة بكاع
ونطرنه من الهوه اعله دروبنه يزيد
ومن كلنه انتهت .. وتبين هلال
شو لاجف حبرنه ولا طلع عيد !
منو ايسكت نشدها التحجي بالماي
دم ماطايح بسالفته اليعيد
سله ادور الثمرة التجي بروح
تريد بجالها تعيش العناكيد
صعدنه بسفرة المتشيلهم كاع
ورجعنه نسولف بسفرة مكاريد
واذا طول سفرنه وفاتنه الشوك
الدمع يتلاكه من تبطي المواعيد
وفاء الخفاجي
رد مع اقتباس
المشاركة الأصلية كتبت بواسطة فقار الكرخي
