اول دم سبگ ممشاك
يااول نهر غناك
يااول حرف بشفاك
انت هنا وانت هناك
انت الرايح وما جاي..!
لا صليت لا غنيت
لو حنيت..؟
لو بعدك غريب وما الك بالروح
صورة بيت..
تبحر والتعب جاسك وظنك من تحط
تلگالك إحچايه وجرح يضحك..؟!
لونك ما يغشك والصدگ لونك
ما ترتاح لو رديت
دگ فوگ الشمس دمك
وانسه الناس..
خطوات الغريبه الماتت اگبالك نهرها
انباگ
لا تندار
احسب للبعدلك والنجم يطفه
شتلگه تريد من اتموت
جدامك حزن عمرك
وشباچ السنين اليعبر إبليلك
فتحت باب ليام الجديدة الما الك بيهن عرف
وتضيع بالتابوت
شتاخذ بين اديك تريد
شتلگه هناك
ما تسكت..
وياهو الچان بحسابك يطب
وياك..؟
شلون تعيش وانت الميت من اول نفس
جاسك
بجيوبك إحساب النهر والفلاح
تعيش تموت ما تخلص
فوگ اسمك عمر تعبان ..!
وما ظن بيك توگف عالنعش بسمار
وتمشي ابكل ذنب جناز..؟
شهگة گاع بضلوعك..
والسجة البعدها بخاطرك خضره
چلب بالگمر والطين
واسهر لليجيك إليل وافرح..
للتراب العين..!!
من تفرح يرد الماي والعِشره
الصدگ ترجع…
والشبگه التعثر الما تخاف الله ترد تضحك
تشوف امرايتك وجهك..
واتحن للگصب روحك
وليلك من يمر يلگاك ذاك انت طفل يلعب وما يتعب
وتهز راسك الكل نجمه
الكل باب استحت تنسد بوجه الضيف
بيها الله الصدگ وانت…








احمد فشلان الوائلي