سؤالي ابيا سبب محروكه بابي !
وانا عين لعلي وعين لحجابي
وسط نارين ..متت مرتين
.. سؤالي
أريد اعرف سبب هاي الجريمه
دوافعكم جديده لو قديمه
انا شسويت وأحمل هالظليمه
جنت أم والدي وهسه يتيمه
وحك رب السمه لولا الوصيه
ولا كلمة وإن كالوا عليه
أدير العين .. متت مرتين
سؤالي ..
______________________
انا اشسويت والظالم عصرني
دكولوا ابيا سبب سبني وسطرني
قبل ضلعي تره الظالم كسرني
علي حاضر الشدة وما حضرني
تقيد بالوصية وانه اعذره
وانه ابهالحال وادعي ربي صبره
يبو الحسنين .. متت مرتين
.. سؤالي
______________________
صغار القوم يالبينا كبرتوا
على اجتاف النبي وحيدر صعدتوا
بنينا امجاد بس إنتم هدمتوا
وفينا اشكد وفينا وهَم غدرتوا
طبع بيكم أصلكم ناصبيه
تجازون التسامح بالأذيه
وفاكم وين .. متت مرتين
.. سؤالي
______________________
قبل يا بت نبي كسروا ضلعها
جبير الكوم عالحايط دفعها
بِلا رأفة صفعها ومن صفعها
تره ونتها ابو القاسم سمعها
صحابة وكل بطولتهم عذابي
وانه المفروض يتقدس تُرابي
لَهُم وَجهين .. متت مرتين
.. سؤالي
______________________
طحت والباب طاحت من ونيني
وإذا أنادي علي حتماً يجيني
صحت فضه تعالي وساعديني
ضلوعي وعيني والباب وجنيني
إجت فضه وإجت زينب وراها
تنادي شمعتي طفوا ضواها
سطرني البين .. متت مرتين
.. سؤالي
______________________
إجت زينب تناشدني اعله حالي
اخوها والأخو يا ناس غالي
كسر ضلعي خفيته ولا اُبالي
أخاف اعليها تعرف بالجرالي
أشوف الباب واتصور خيمها
مسعره وتلتفت ما هُم زِلمها
ولا جفين .. متت مرتين
.. سؤالي
______________________
يزينب هذا حيدر يمنه حاضر
إحفظي ونتج لنهار عاشر
غريبه اميسره بين العساكر
وابو اليمه تدك صدره الحوافر
سهل هذا ييمه المر عليه
يزينب والحزن بالغاضريه
وانه ابجرحين .. متت مرتين
.. سؤالي
______________________
إجاني حسين واني عيوني حمره
يحاجيني وبقت عيني اعله نحره
عفت ضلعي وحسبت اضلوع صدره
تراوالي تسحكه اخيول عشره
نعم عشره وحوافرهن ثكيله
ييمه قصة امصابك طويله
ييمه حسين .. متت مرتين
.. سؤالي
______________________
كلمات الشاعر -- السيد عبد الخالق المحنة
Mp3
رد مع اقتباس
المشاركة الأصلية كتبت بواسطة Suhaila wisam
