ليل والنجمه البعيده .....
................... دافيه بشهكَة نفس
وحدي ويَّ المدري شنهي آيفور بيّه ،
ايفور صنطه بلايه حس .
كل شي بيّه ايريد يصرخ ،
..........كل شي بيّه آيكَول اِس .
وحشه كلّش بارده وضلعي ثلج .
رجفة آيد وكاس فارغ ،
................لا دبيب ولا لمس .
والسوالف ،
مثلما هيّه السوالف ،
................راويه بدموع آمس ،
وروحي لبلابه بوجه شباج بارح .
كل ترافه بخاطري آتبزز بروحي .
شنهي أترف روح من الماي ؟
...... ........ حتى الماي جارح .
اشلون ما ينلجم جرحي ؟
..............اشلون أكدر ما أحس ؟
اِيْه يا النجمه الكَبل تسبح بروحي ...
................وعينها خاتم عرس .
ليلي دوخة راس ،...
فارغ كاس ،....
وآنتِ بلا همس .
ليلي وحشه بلا وِنس .
فدوه باالنجمه البعيده ،
بلجي من يمّج تندهيلي الشمس .
عبدالكريم القصاب
رد مع اقتباس
