هنيالي بوليدي الكَمر .. هنيالي
يالنشفت ريج النهر .. يالغالي
يفياي زينب عالخيم .. خليتك
ياغيم يمسومر مطر .. ياعالي
عباس انت العدل ميتين هالناس
تنشال فوك العكَل ريشات عباس
بس صوچ هاي البشر مافاهمينك
مولاي ياعباس مولاي ياعباس
عباس ماريد الهوه .. رايدتك
وين ادري تطلع نينوى .. عاشكتك
نيشان صارن للكرم .. ريشاتك
جا غير من طينة علي .. مخلفتك
ياراية بچف علي ويا راي الراي
عباس فوگ الخيم ترتيلة ماي
بس صوچ هاي البشر مافاهمينك
مولاي يا عباس مولاي ياعباس
عباس لليوم الشعر .. ماكاتبك
يكتبون ويطيح القلم .. يم حاجبك
والراسمينك تيهوا .. بعيونك
حگك اذا حتى الكمر .. ماعاجبك
ياريح عنبر فحت ياسورة التين
ياخرزة فاطمة وياهيبة حسين
بس صوچ هاي للبشر مافاهمينك
مولاي ياعباس مولاي ياعباس
محسودة بيك امك صدك .. محسودة
والبخت ماتنسد علك.. بزنوده
لو مشتهي يشيل النهر .. بجفوفه
جا هسه غرگت كربله .. من جوده
يوليدي و بالوصف محتاره وياك
سبحان رب الخلگ ومنين سواك
بس صوچ هاي للبشر مافاهمينك
مولاي ياعباس مولاي ياعباس
ماكَايله البيه بعد .. ماكَايله
هنيالي بيك عله السمار الشايله
عباس يملوحة علي .. وعيونه
مالت المهره و كشختك .. ما مايله
حي الله ابني الكمر والهيبه البيه
ومن طينتك ياعلي الله مسويه
بس صوج هاي للبشر مافاهمينك
مولاي ياعباس مولاي ياعباس
اداء : فاقد الموسوي
كلمات : محمد الموسوي
تدويني
رد مع اقتباس
المشاركة الأصلية كتبت بواسطة براءة العشق
