لا تآمن عتب وكتك سحابة گيظ
بس تعلى الشمس يصحى الفضى وتگشع
ولاتاهم صفوا وتشرب لان دنياك
ماتنطي المغفل ديسها ويرضع
وإذا ضحكك مرة الوكت لا يغيرك
لابد ماترد منه بجفن يدمع
الوكت مو دوم گمرة وصاحيهة من الغيم
ولانيسان دوم وطيبة المرتع
ولو ثوب الصِبَا لطولك ياناهي ولام
وانت بتيه مسعد تلبس وتنزع
العمر منطر صبح واليصح منك فاض
حسبك بين ايدين الوكت تتمذرع
انطوى بساط السَمر والبقت وشلة كاس
لاتروي الظَمَأ لاتضر لاتنفع
العمر گوض يناهي وساگ حادي العيس
توم المن بعد لا يرى ولا يسمع
تدنالي اعلى بختك تشتهيك الروح
خل تنزع حزنها وتلبس مرصع
وقاسمني الهموم وهات وآني انطيك
وشعندك سوالف گول خل أسمع
احجي ولاتضم واحنا ببداية ليل
ريت الشمس رمدة وعمر ماتطلع
انا توني لگيتك لگطة فوك الشان
يل عيب الملاگط عن بعد تلمع
وتوة البخت دگ باب الهوى المسدود
وفتح بابين گلبي وللعشگ شرع
انا عطشان كلش حد نشاف الريچ
والغراف من شفتك شهد نَبع
اسگني من الشهد بثنين ايديك ارداف
يالكلك شهد من كل كتر مترع
سولف والتگوله النوب عيدة اردود
بيَّ لعذاب صوتك جوع خل اشبع
ولوليلي اعلى صدرك خل اضوگ النوم
وخل عين العمر ماغمضت تهجع
تدنالي ارد اعصرك وانعصر وياك
واحرگ برد روحي بنارك التلسع
تدنالي وتدلل واسحگ اعلى الروح
وسعة بال روحي وعمر ماتجزع
ارتجي بثگلك عليها ولاتگلك لا
خلگ الگاع عدهة الخاطرك وأوسع
طبع بيها الذنوبك شانها الغفران
كل ما كبر ذنك تغفر وتشفع
تدنالي ارد اشمك واسكر من هواك
ياعطر الخزامة بكل كتر ضوع
انسى شما شفت ليلك اضغاث أحلام
مو كلما شفت من نومتك تفزع
اشعليك من الوكت لو كشر وراواك
سن يغريك بيه وسن جذب يلمع
ماتدري شيصير وهاي دنيا اتدور
ماتنطي بكثر ماتحرم وتمنع
اخذ بس لذتك والآتيات الغيب
تايه راي اذا بالغيب الك مطمع
اغتنم من دنيتك لحظة البيها تعيش
امس موش الك ماضي وراح مايرجع
ولاباجر مثل ماتشتهيه يصير
صافي الود مثل ماترغب وتطمع
تدنالي ارد اضوگك شوگ ماضگتاش
ولاعمرك عرفته وفوگ ماتسمع
انا مثلك وله ومطورح من العام
تدنة ازگيك بيدي وبيك خل اكرع
انه خوف الگطه ومرتاب من دنياي
ومذير يناهي ووجل ومروع
دمد ضلك عليَّ وخل أمن بيك
واجبر خاطري المن ساعته مصدع
دعط دنفر جعودك عليَّ سد وفياي
واطني شكر عندك شوگ لا تگطع
يالحسنك البدعة وسورة الغراف
يا سنبل بديم اعلى المزر فرع
يالصوتك انغام ولا لحن زرياب
فتنة من الاوتار الناعمات اروع
شكثر صاغك الباري شلون مدري شلون
جلّت قدرته شما صور وابدع
يالطيشك غنج وتمردغك بوسات
تيه شما حلالك لحد ماتقنع
يالبعدك صغير وترس صدرك زوم
اعبث واشتهيك وميل وتدلع
اصوغ الشاردات من الشعر شذرات
هذا اول الغيث وغيرهن يتبع
وتگلي اكتب عليَّ شتظن اگلك لا
وانت بكل قصيدة العجز والمطلع
رد مع اقتباس
المشاركة الأصلية كتبت بواسطة عدنان الحاج عباس السعيدي
