20 معلومة عني يعني اني واللي هية didi
السلام عليكم
طبعا هاي 20 معلومة عني بعضها غريب وبعضها مينطلع بيه اصلا موجود عند الكلالمهم صار تكملة عدد ههههه
1 – ما اثق بالناس بسهولة ولا اختلط بسرعة يعني من ادخل بمجتمع ابقة بعيدة لحد ما اعرف الكل طباعهم وشخصياتهم يلة ابدي اختلط
2- ما اتخذ صديق بتسرع الا اخلي المقابل بحزازيات ومواقف متعبة بالنسبة الة وياية يلة
متبعة قاعد علمتهة الية والدتي (صاحب صحيبك سنة وبعــد السنة جربــــــة وامشي وياه بزعل وبعد الزعـــــل جربــــــــة لوشفتة ماينزعج ومنك فلا ينحرج تقدر عليه تعتمد واكثر بعد جربة ) لان اقدم كلشي للصديق
3- ما احب اشتغل شي وية غيري احب اتفرد وحدي باي شي اسويه لان ماحب اتكل على اي شخص غير نفسي
4 – اذا انتهت علاقتي بشخص ما اتاثر ابدا عندي شي طبيعي مباشرة استرد زمام الامور عقلي يتحكم باغلب تصرفاتي
وممكن ارجع احجي وياه عادي
5- اي هدف اريدة ابذل كل جهدي عليه وما اتخاذل ابدا يعني ممكن ابقة فترة طويلة متابعة بدون ملل ولا كلل
6- عندي قابلية انو ما انام لمدة خمس ايام او ستة اقصى مدة وصلتهة مرة وحدة جانت لمدة اسبوع من جنت بمرحلة اولى بالكلية جانت فترة امتحانات منمت لمدة سبع ايام متواصلة /
7- عندي ذاكرة صورية طبعا تعتمد على الاولويات الخاصة بية فوقتهة ما انسة حتة ابسط الامور والتفاصيل
8- كلش انعزالية من اكون بمجتمع ما ارغبلة اسحب نفسي بهدوء منة ويبين علية هالشي بحالة طلب مني احد الانضمام انو اني ممتقبلة هالمكان واجتماعية وية الاشخاص اللي ارتاحلهم بشكل مبالغ بيه سواء كلية او عمل او اقارب والخطار ابد ما احب اكون يمهم من يجون بس اذا اشخاص ارتاحلهم كلش كلش يعني حتة مو ارتاحلهم
9- احب اتعلم كلشي بس مو بنسبة جبيرة يعني اخذ الاساسيات واكون ملمة بيهة وراها امل من الشي هذا واروح لغير شي المهم ما يمر كدامي شي وما اعرفة
10- عندي هوس بتعلم اللغات حاليا تعلمت 5 لغات واول لغة حتة اتعلمهة واتقنهة استمريت 6 سنين واللي هية الكورية
11- احب الابراج واحب اقارن بينهة وبين شخصية الانسان الحقيقة ودائما تطلع مضبوطة بنسبة كلش جبيرة
12- ماحب الاشياء الفخمة البيوت السيارات الحدايق اي شي فخم ما احبة احب البسيط والكلاسيكي واللون الاسود عشق
13- اكدر اتحكم بعصبيتي كلش يعني اكون كلش متنرفزة بداخلي وممبين علية والعكس اكون كلش هادئة واسوي نفسي عصبية هاي اسويهة من اكون اريد اوصل فكرة انو هالشي اللي ديسويه المقابل خطا ويحس ع نفسة لان مو بسهولة انفعل اني فاكون محتاجة شوية انفعال هههه
14- اكدر بكل سهولة انهي ادماني وتعلقي بشي او اشخاص يعني مثلا اذا اكو فد اشياء معينة احسهة بدت تاخذني وتسحبني الهة وبدة يصير يومي فوضى انهيهة اورتب امري واحسب الموقف والظرف واشوف اذا يناسب ارجعلهة لو لا وحسب النتيجة امشي اما الاشخاص اذا رجعو عادي واذا ما رجعو مياثر علية بشي داخلي
15 – ابد ما احب افضفض مشاكلي لاي انسان نهائيا يمكن بس مرتين بحياتي مفضفضة عن اشياء صارتلي
16- اكدر ابقة بلا اكل لمدة 4 ايام وهاي جانت اقصى مدة وصلتهة لان اني كلش احب اجتي فترة كمت ما ابطل اكل ابد فعاقبت نفسي انو ما اكل واستمر العقاب اربع ايام هههه
17- مع انو كلش هواية اطلع بس بالحقيقة ما احب اطلع من البيت ابببد لو بيدي اكضي حياتي كلهة بغرفتي بس الضرورة تستدعي انو واحد يطلع ويشتغل +_+
18- اخاف من اي شي رعب كلش خوافة من سوالف الاشباح وهيجي بحيث مرة شفت فيلم تشاكي بقيت يومين لو 3 ايام انام يم امي واخاف اعوفهة هالحجي واني موصغيرة جبيرة وقتهة هههه
19 – متابعة نهمة لكل المسلسلات الكورية واحب الانميي كللللش يعني بعطلة السادس من خلصت الامتحانات بقيت 3 ايام منايمة لحد ما خلصت مسلسلاتي ال يلة رحت نمت
20- اذا تصيرلي زعلة من احد ورة دقايق انسة انو زعلانة وياه بس طبعا يبقة الموقف ببالي بس المهم عادي ارجع احجي وياه حتة لو هوة غلطان بحقي كلش
رد مع اقتباس
المشاركة الأصلية كتبت بواسطة مرتضى علي
