هيه العگارب ذيلها اليكتل
اذا جدمي ايتلولح لاتگول ايطيح
مثل العنكبوت اتلولح من اغزل
ولچمتك لاتبين عود ما ملچوم
الحجول بفرح وبمگبره تهلهل
دشعل نار كبره يم فسيله وشوف
جمار امهه يسود گبل لا تشعل
سرج عالنبح شدوا غير گلت خيل
شو صدگ بروحه ويمي ضل يصهل
المنجل بتر ذيله وشاع صيته هلال
الوادم صدگت بس چذبه السمبل
شكثر صبر الجذع من شفته عد حطاب
طگاته اعله طوله ودمه ما ينزل
ومو كلمن غرگ بالماي شفته ايموت
الطوس تموت من حبوبها توشل
السفينه التايه بنص بحر لو تموز
تلگه شراعها من الفشله متبلل
اشگد اكره الخشبه الرافگت تنور
بجثث خوانها من تخمد اتعدل
ومن يگضي الحطب وبعازه للخبزات
يچيموها وتريد ارماد بي تختل
گبل حسبالي كلمن ينكسر ينعاب
وشفت تفگت الصيد التنكسر تكتل
ولا تعتب بعد لوما يمرك طير
الفزاعه عليه غراب ما يجبل
بيتك ذيل الابره اليطب بره ايبات
شفتك للفتوگ تسلم اليدخل
لاتفتح ذراعك للسجين ايخاف
ايتراواله صليب وحگه اذا يجفل
يكون اطلابتي وي راس حيه ارتاح
بس هيه العگارب ذيلها اليكتل
سعيد شميل
رد مع اقتباس
