لو يحظن شمس هم يبرد المشتاگ
المفارگ يصوفر من يشوف اثنين
تلگه بروحه خوف وموقف وذكره
إخذ صورة درب راويها للمسجون
بس يشوفها يخضّر مشي بصدره
اليغرگ بالنهر وتطلعه من الماي
يظل خايف بعد ما ينزل بگطره
المفروض بهوه يتغسل الغرگان
ويصير الدمع ممنوع يم گبره
ومو بالگاع نحفرله الگبر بالناي
حته شما بشر يعزف هوه يمره
وللغرگان ﻻزم ما نثوب الزاد
نهدي الفاتحه ونتنفس ونقره
المفروض بحچي تچفن الخرسان
وثواب الهم سوالف نترس السفره
المفروض بچفن يتشيع النجّار
تره التابوت گبل المگبره يعصره
واليغص برمش مفروض يشرب طيف
اليغص بميل واگف ينشرب عمره
بعد قيمتي التوجعني اطيب شلون
تره احساس الورد بس النده ايقدره
اطيح من السمه ولا اطيح من العين
اجبر اعظامي بس تقديري شيجبره
ولو يحظن شمس هم يبرد المشتاگ
وعفتني انت بوكت بي ترجف الجمره
گاعد شافني وشك بضلامه الليل
حس روحه ضهر من كثر ما اسهره
ومن اذكرك ينگطع خيط العين
وايطيحن خرزها دموع مطشره
بين يم سكتي ايسولف التمثال
وطويل السانها وماتسكت الصخره
غير الفارغ ايرجع صدى اليحچون
فراغي بغيبتك رجع صدى النضره
صنطت والسوالف بس دمع فرگاك
ذبلك خيط وسمع لا تذب ابره
گبل لا اضوگ هجرك چنت اثق بالذيب
بس هسه الورد ما امن بعطره
اثق حتى بعدوي ووصل شكي وياك
اصابيعي احسبتهن خاف مو عشره
ومن سئلوني عنك ماگلت غلطان
وطلعت من گفاي مرورة العشره
راح شلون گالو وصفت ممشاك
ساعة رمل ولفي سوالفه بخصره
اليسولف سر عشگ يزغر بعين الليل
الشمع من يحچي سره حچايته تگصره
حسين السيد نور
رد مع اقتباس
