بما إني من الناس اللي اعشق الفلسفة ، وأحب احلل كل شي
ومجتمعي الكريم ما يعطوني على قد جوي ..
فقلت مالك الا الدرر
فقررنا نفتح هذا الموضوع
نبدأ اليوم بسؤال دايماً أفكر فيه ؟
شلون تصير فيلسوف ؟ أو وش يعني فيلسوف ؟ أو ليش تصير فيلسوف ؟
قبل ذلك تعريفي أنا للفلسفة إنك تأتي بالشيء المخالف للعادة والي لايتصورّه الكثيرين
بس عاد مهو تروح حفلة زواج ولابس شورت وتقول هذي الفلسفة.
الفلسفة إن لما يكون فيه مجموعة ناس قاعدين ويفكرون بفكرة معينة
وكل إجاباتهم متقاربه حاول إنك تفكر أبعد منهم وتجيب شيء مافكروا فيه أبداً
الفلسفة إنك تجبر نفسك على التفكير بأي شيء وكل شيء وأي حدث قدامك أو فعل قابل للتفكير والنقاش وبالتالي تغييره مستقبلاً .
السؤال التالي : هل حنا قادرين على الفلسفة ؟
الجواب سيكون : فعلياً حنا ماوجيهنا وجيه فلسفة لسببين :
1- إننا من إنولدنا وحنا نَرضع كل شيء وكل شيء يقدّم لنا تقديم , يعني من ينولد الواحد وترضعه أمه
يبدأ خلاص يتعود على طريقة الرضاعة فبمجرد تقرب الأم الطفل من صدرها يمسك الصدر ويبدأ يرضع لين يشبع , لكن هل تخيلتوا رضيع مثلاً , ماعجبته طريقة الرضاعة هذه ثم قال لا مابي أكون بشكل مستلقي ؟
ابي أرضع وانا بالوضع الفلاني أو الطريقة الفلانية هههههههههههه
هو فيه بعضهم نذل مجرد مايشبع يعض حلمة نهد أمّه , وهذا ينبئ بشيئين يا بيطلع عبقري وإلا بيطلع نذل
في بيوتنا وحنا صغار لما نجوع نبدأ نحولس جنب المطبخ , لين يجي أحد يعطيك شيء تآكله لكن عمرك تمردت مثلاً أو قالوا لك أهلك دبّر حالك
رح كل أنت , وإلا فكّر بطريقة كيف تآكل بدون ما احد يساعدك ؟
حتى لو عطولك الأكل تقعد تدربي رآسك وتآكل
ماقد فكرت مثلاً بالرز الي تآكله كيف جاء ؟
أو التفاحة الي بيدك كيف جات
مثلاً الرز خلونا نتخيل قصته حتى وصل ليدينك ؟
كان في مزارعين كبار او اقطاعيين في شرق آسيا يشغلون ناس فقراء وعلى قد حالهم ودخلهم اقل من دولار باليوم , يشغلونهم في حقول الأرز ,
تخيل شوي من يعمل في الحقل ؟
أطفال , نساء , مشردين , رجال , شيبان , عجايز , كل هذولا قاعدين يعملون ليل نهار عشان يجهزون لك شيء تآكله عساك للمر , منهم واحد ميّت غرام في وحده
وفيهم واحد عاجز عن العمل بس لو ماعمل يموت , وفيهم وحده جايه تعمل وهي حامل وتشعر بالموت وهي تعمل , فيهم وحده تفكر بالسبت القادم وايش بيقدم لها حبيبها ؟
كل هذولا طبعاً انت افضل منهم حال مادي وفكري وعائلي وتنعم بخير مايعيشونه , تخيل بس رجولك انها تكون في حقل الأرز 8 ساعات باليوم ؟ تخيل الناموس حولك
تخيل لبسك معفن وجسمك معفن من كثر جلستك بالحقل ؟
حقل الرز او الرز لما يكون مزروع لازم يغمر بالماء طول الموسم ,طول نبات الأرز يختلف لكن متوسطه متر واحد < يعني لما تقعد بالحقل يغمرك بالماء
وبما انهم شرق آسيويين فالماء يغطيهم للرقبة موسم زراعة الأرز 6 شهور متوسط عام.
الآن انتهى موسم الزراعة , يبدأ موسم الحصاد , وجني الرزق
ينتقلون لمرحلة ثانية , مرحلة انهم ينقون الأرز , كيف تنقية الأرز
يقسم الأرز لعدة درجات , فاخرة , جيدة , رديئة
الفاخرة تصدر للدول الغنية وتكون مميزات الحبّه كاملة يعني مافيها كسور ولا تكون الحبه صغيرة ولا تسوى من يشتريها , وبنفس الوقت مافيه شوائب
شوائب مثلاً حشرات , او كسر غير متكملة من الأرز , او تراب او عصفور ميّت او جرادة
الآن حصدوه , وتم تقسيمه لعدة درجات
الآن يتم بيعه من المزراع البسيط او الإقطاعي الكبير , الى التاجر الكبير او الى الدولة احياناً , تجي الدولة تعبيه بأكياس او التاجر المصدّر بأكياس حسب طلبات الدول او الموردين.
يجي التاجر مثلاً يروح لللهند مثلاً من مطار بغداد بالطيارة ويستأجر فندق وتنقلات
ثم يقال لاشار الهندي الإقطاعي ثم يوقع عقد معاهم لمدة سنة بأنه بالسنة ابي منكم 10000 طن رز فاخر وو وهكذا
لما يحصد ويقسم ويعبئ بأكياس حسب نوع الكيس المطلوب , يتم ترحيله للميناء , بالميناء يكشف عليه من الجمارك المصدرة
ويتم عد الأكياس وتنتقل سفينة كاملة من الهند للعراق تقعد على حسب السرعة شهر او شهرين تتعرض لعواصف وقراصنه كل بلا وجلا
المهم لين توصلك تجلس في الميناء في البصره عدة ايام حتى تفسح ويأخذ موافقة لدخولها ثم يبدأ وزن الحمولة كم وعدد الأكياس
قبلها التاجر دفع ضرايب هناك بالهند وهنا بالعراق لمخلصين لأجل يخلصون له الحمولة
يآخذ التاجر الحصة كاملة فرضاَ ثم يبيعها على تجار آخرين اقل درجة منه
ثم التاجر الكبير يبيعها على تجار المناطق , ثم تاجر المنطقه يشتري منه الموزع الصغير ( بقاله , سوبرماركت , فرد ) ثم ياصل البيت عندك
لما يوصل البيت عندك يتخزن , ثم عاد حسب من يطبخه زوجتك او اي حد, الخ الخ , حتى يصل لبطنك
فكر وانت تآكل حبة الأرز , بالقصّه هذه , تخيل من عملوا بتلك اللقمة لأجل أن تصلك
الآن دوركم فكروا بأي شيء يمكن تتخيلوه , لما تجلس عند أهلك , أقعد تفلسف عليهم بكذا ترا كلهم ماجاء على بالهم ,بس حسسهم كذا بأنك فاهم
هي كذا الفلسفة , ترا الفلسفة ماهي تصنع صاروخ او طيارة او تخترع برق او تخترع جاكيت لما يضيق صدرك يسولف عليك
لايضيقون صدوركم الناس لما يقولوا فلسفة
ابداً تفلسف بأي شيء انت ممكن تتخيل
في الدول المتقدمة في المدارس يدرسون الطالب شيء اسمه الخيال , او التخيّل , مدري شسمه بالضبط لكن زي كذا بحيث الواحد لما يخلص المرحلة الثانوية يكون عنده قدره على تحديد طريقه قدره على اتخاذ قرار , لما يجي بيتخذ قرار يكون تفكيره عميق
اصلاً اتحداك تلاقي واحد امريكي او بريطاني او ماليزي بالفترة الاخيرة يتخرج من الثانوية ويقول مادري وش ابي ؟ او وش التخصص الي ابيه
كل واحد تلاقيه من الابتدائي له هدف بداخله وله شيء بداخله يبي يسويه وتجد له اسبابه
يعني موب بصير مهندس وبس ابي مثل مناحي ولد مطلق
لا
ابي اكون مهندس لاني اتخيل واتصور ان الهندسه هي كل العلوم وان الهندسه لايقوم الطب الا بها , ولذلك تم استحداث الهندسة الطبية واستحداث الهندسة الوراثية واستحداث الهندسة القريحية
حنا الواحد يتخرج مدرس رياضيات ويغثّك لو تقول شي قال الرياضيات , ولما تبين السالفة يطلع على بند بعد
لا ومتخرج بتقدير مقبول وكان اساساً وده يكون مدرس تربية فنيّة .
الي بقوله ان حتى مدارسنا كنا نعتمد على التغريق المعلوماتي بس ماقد قال لك مدرسك ليش ؟
اصلا انت اذا قلت ليش صفقك المدرس وقال خل نخلص الدرس
ماقد خلوك بالفصل تتخيل كيف جاء الشيء الفلاني وكيف صار الشيء الفلاني
امسك طفلك الصغير بليلة هادية واقعد إسأله أسأله تحرضه على التفكير
مثلاً قل له لو بكرة انا ماجيت اوديك المدرسة شلون بتروح ؟ وش الطريقة ؟
لو طفا الكهرب كيف بتشوف بالظلام ؟ شمعة ؟ طيب كيف الشمعه صنعت ؟
طيب لو صار كذا او كذا شتسوي , ولما يجاوبك اجابه خله يعطيك غيرها
لاترضى بالاجابة العادية المنطقية , لما تمشي معاه بالسياره او بالسوق
دخله بنقاشات وكيف هذا صار وليش ذا , خله يحكيك عن قصص وهمية
دائماً وانت عند ربعك ويقولون سالفة مثلاً انت ماحضرتها رواية عن واحد , قصة سرقة او قصة نصب او قصة حادث
ابدأ انت تخيل سيناريو مختلف باعتبار ان الحادث الي حصل ماشافه احد , واول واحد جاء للحادث بعد خمس دقايق من وقوعه
ابدأ تخيل انت طريقة الحادث , ضع تصوّر , تفلسف شوي , موب لازم تعرف بس اربط بعض الحقائق مع بعض
المحققين الي درسوا التحقيق,وهم طبيعتهم لايقه عليهم مهنة التحقيق مايرضى بأي سيناريو يقال له , يعني يجيله لص ويحكي له سيناريو
السيناريو مقنع بقوة بعد,بس قدرة المحقق مش على الدلائل احياناً بقدر ما أنه يتخيل سيناريو آخر
يتخيل وضعية أخرى , يحاول يربطها ببعض حتى يجد ارتباك على اللص او تغير في الأقوال
انت تقدر تسوي كذا , بعد بأي شيء بالحياة .
حتى في الأفلام السينمائية
لاتقول الفيلم حلو , حاول تنتقد الفيلم مثلاً
لما يقولون ابو نورة فنان العرب وبطيخ ومدري ايش
وانت مقتنع انه فنان قل لا ياخي والله خامة وطبقة صوت محمد ماش
ماهي من ستايلي , انا اشوف طبقات الصوت عند ماجد المهندس أفضل
وكذلك طول النفس عند الفنانة أصالة أفضل
القراءة لها أثر جميل على الفلسفة يعني كل ماقرأت أكثر كل ماكان لك قدرة أكثر على الفلسفة , دايماً ايضاً حسس الي حولك انك راعي قراءة
مو ضروري تفصح عن الي تقرأه انت , لكن قل لهم معليش انا رايح اقرأ
شلون تحسسهم ؟
جالس انت واهلك في البيت سهرة عادية إستأذن واطلع , لو قالوا وين بتروح ؟
قل بروح أقرأ , موعدي للقراءة من 10 بالليل حتى 12 , معليش
ما أقدر اخرب برنامجي
لو دق عليك احد أثناء هذا الوقت وتشوفه إتصال مو مهم مرّة لاترد عليه , حتى لو كرر الإتصال مثل عادة بعض الملاقيف
لما تتصل عليه تشوف وش يبي قل له معليش والله كنت اقرأ ومستغرق بالقراءة
بيجي يسألك وش تقرأ , قل كتاب , بيسألك وشهو , قال بعدين أعلمك موب وقته
لما يجون اصحابك يقولوا يلا بنروح,قل لا الويك اند هذا عندي كتابين لازم اخلصهم , انا مستمتع فيهم كثير ومتحمس لهم , وعقب اشرح لكم
فيما لو جيت بتروح , قالوا لك بنروح البصره ثم نطلع للكويت
اقعد تفلسف عليهم وقل لا ليش ؟ وجب لك اي رحلة سياحية ثانية غيرها
وطور قدرتك على الاقناع بناء على رؤيتك الشخصية للموضوع
عموماً لما تقرأ كتاب اي كتاب حاول تطبقة لأجل يرسخ في بالك
مثلاً لغة الجسد تقرأ الآن , حاول أنك ماتخلص الكتاب الا انك مطبق كل شيء فيه
لو على أهلك , حتى لو تستنتج من معلومات الكتاب وبعد التطبيق على أهلك أنهم مهابيل
موب مشكلة قو أهد
لما تقرأ كتاب فلسفة مثلاً او كتاب يحوي مصطلحات مثل ميتافيزيقيا
حاول تجيب الكلمة هذي بأي نقاش مع صديق,حتى لو تتناقشو عن سوق الغزل , ولا تنتظر يسألك وش تعني هالكلمة
لان العراقي مايحب يسأل ويبين لك جهلة يبي يحسسك انه فاهم
وش تقول ؟ قل والله سوق الغزل اشبه مايكون بالميتافيزيقيا , وامممم واعرف ان ميتفايزيقيا مصطلح جديد عليك لكن عموما الميتافيزيقيا تعني علوم ماوراء الطبيعة ثم تكلم له شوي عن متى بدأ ومن اشهر علماءه وكيف ومدري ايش واقسامه
انت استفدت شيئين اولاً انك قاعد تمارس عملياً المعلومات الي تقرأها , والثور الي قدامك قاعد يحس فعلاً انك فيلسوف وتفهم كل شيء بالحياة
حاول مثلاً تجيب كلمة أنثروبيولوجيا , وبنفس الطريقة إقعد إهذر فيها ساعة , وعادي مع الي تقرأه قل وجهة نظرك الفلسفية , يعني خل لك نقطة تخص وجهة نظرك ,
كيف تتفلسف ؟
مرّة سألني واحد عن الفرانشايز اظنه سمعها كذا وسألني لانه مقتنع اني عندي علم
ماكان عندي المام كبير تماماً, قلت الي اعرفه انا ان الفرانشايز باختصار وعشان ما ادوخ رآسك وتتعب معاي
تعرف كودو , قال ايه , قلت تعرف برقر كنق قال ايه , قلت تعرف مطعم أندروير قال ايه < طبعاً مايعرف معنى أندر وير بس لازم يقول ايه
قلت هذي شركة كبيرة قوّة واقصد برقر كنق واندروير ,يملكها شخص او عدة أشخاص او تكون شركة مساهمة,بس مالهم خلق يتوسعون بالعالم , ويبلشون بأنفسهم , وش عملوا عشان يتوسعوا ويجيلهم قروش ؟
قال مدري
قلت انا برقر كنق ومعروف بالعالم , جاني واحد من الغربية مثلاً او الجنوب
يبي يطوّر البدو الي عنده ويخليهم يكشخون ببرقر كنق بدل التشريب
المهم يجي الرجل الي من الغربية يجي يروح ويراسل الشركة الأم , او وكيلها بالعراق ويقول يلا انا فلان بن فلان عندي مؤسسة وسجل تجاري وبفتح لكم فرع بالغربية , عندي عمال جاهزين بعد
تجي الشركة تعطيه الشعار اولاً
وتعطيه التصميم الي يسويه ويكون مثل الشيء الرسمي حقهم , انت توحي ؟ قال ايه
قلت ثم يجون ويآخذون عماله ويدربونهم يسوون الأكلات,ثم يرجعونهم ويبدأ الإفتتاح
عاد مقابل الإسم الشركة الأم تآخذ مبلغ سنوي يتفق بينهم عليه حسب الموقع والمدينة والخطة التسويقية وكذا , وتساعدك في طباعة الاعلانات والجرايد والخرابيط
8
8
الي فوق معلومات فعليه اعرفها انا لكن مهيب كاملة
قلت لكن انا وجهة نظري بالموضوع حرام هالشيء اولاً
ثانياً ماينفع لان هذا اقطاعيه , وش يعني اقطاعيه ادري انك ماتعرف الاقطاعيين هم الناس الكبار قوّة , الي يتجرون على ظهرك وظهري ويآخذون منك ارباحك ورزقك ويعطونك شيء قليل يادوب يملئ فمك مثلهم مثل حقين الرز الي تكلمنا عليهم فوق , يستغلون فقرك بالعمل بأقل من دولار بحقل مغمور بالماء
اتصور يعني لو تفتح لك محل انت او مطعم وتفكر بنوع أكله معينه وتجيب لك معلّم ممتاز وتعطيه نسبة كويسة , ثم تحط لك شعار كويس ولوحة كويسة وخطة تسويقية كويسة راح يكون لك افضل , بلاها عاد ان اهل الغربية ياكلون برقر كنق
لو قرأت كتاب ولا لقيت أحد تسولف معاه , راسلني أنا مستعد أقرأ ذات الكتاب وأناقشك
في المعلومات الي فيه , وياتفوز علي ويا أفوز عليك
آخراً , درّب نفسك على الفلسفة , على انك ماتقبل بأي شيء كحقيقة واقعه قدام عيونك
دايماً تخيّل إن خلف الباب شيء جديد , حاول إكتشافه
رد مع اقتباس
.. الفلسفة هي ان تفكر بما يطابق , او على الاقل يكون قريب من, الواقع.. هي ان تفسر كل شئ وكل حدث تفسيرا منطقيا ومقبولا لدى العقل.
