كون اشمهم
يا حزنهم
يا فرحهم
يا غرب وحشة صورهم
يا تعب عيني المشت دمعة بعمرهم
لونهم يچوي الگلب والليل ما ردهم حلم
لعيوني مره
نجمة الله بدربي ترسمهم جمر واسنيني شعره
كون اشمهم
كون احب اعيونهم ومسح تعبهم
من وره اثلاثين عام وعام واعيوني الدربهم
ما چوتني الفرحه مره
گبل متغيب الشمس رديت المهم
غابت وطلعت وغابت واني يمهم
ما لگيت الهم رسم لا ليل ياخذني الحلمهم
بلا ظهر رديت مكسور الگلب والصوت ضاع
مسافرين ابلا وداع
لا مشابگ روح لا دمعة التطيح بعينهم
من عيني لا نشغة اموادع
وحدي رديت وحزن يدفع حزن غربة مسيه
ويالنجم ضاعوا نجم وهلالهم طيف الشواطي
شرد اگلهم
الروح ما تنسه التريده ولا نست خوف
الجزيرة وليل امس
الباب ما مرتها ريح ولا اصابع
والحزن يشرب رسمها وضايعه
ولا جيل يعذر..!
العايشه ابلا راس ما تگدر ترد ذاك الفجر
وحساب تخلص..!
والاسامي اتضيع والعابر نحر لو چف عزيز
ارخيص دربه
دمعة اليفرح چذب بالناس ما واحد ايحسبه
الخوف ما غنه الضوه ولا رد نشيد
فرحة الله دموع غيمه
بناس ما طرها العشگ والخير
ما سده بعمرها
هيل ما صح بيه تغسل اذنوبها
وترسم نهرها
اترابها بوجه الگمر ومراية الدم اشكسرها..؟!
ما يلوگ الها الفرح
والثوب الاسود موش قسمه..!
شرد اكلهم
والحزن دگ بالگلب بسماره من اول محطه
وضاع كلشي
وما متت واسنين ميت..!
احمد فشلان الوائلي
رد مع اقتباس
