ما أسامحك
معاتب الـ وينك يغثني
عودتني أشتم رگبتك لآخر ولايات ريتي
و علمتني
كل وطن أشطب على اسمه بحجة عيونك هويتي
ليش عفت العطش يتشلبه اعله خصرك
وانا كتلك
ياما كتلك
يا گمر حضني جبير لا تبات اعله الشواطي
الشمع ما يسترله شامة
بين سرداب العبي
تيهتني
وانا اعبدك
منين ادبرلي محمد يشتريني
طفحت الغربة اعله گلبي
و ركض ما بين الصور
ركضة دخيل
يا فضيحة الما تسدها عيون خيّر
شايل هلالي اعله متني
و واگف أتوسل سماك
عازتك خلت سماري يسجد الكلشي حضن
دير وجهك و إسگي ضويااتي
ينفنوف الشمس
بغيبة عيونك صدك حسيت بي هيبة السجن
كل الولايات فرغت من مشيت
انت يا اول ابن آدم جانت عيونه وطن
يا حبيبي حزنك يغرگ المناير
من يمر موسم نشد
منين اجيبلها رسول امة وحشتك
يا حبيبي الغنا ياخذني اعله بابك
و اوگف بهيئة سعف
يا حبيبي
نامت الناس بعشگها
و انا وعيوني الغريبة
تايهين بليل حزنك
يا هو يندلني بفرگتك
ساجن شموسي حدر فيّ الگصايب
الشاهد الله
العشگ لو يقرا النوايا
جان شگگ منك ولاية رسايل
يبست بيه حلم يسوه الخضار
شما أصد لولايتك تعتگ رسومي
والگه عمري رزق مكتوب الدكاكين الندم
مرني حنّيني بسمارك
النهر يتحنه بشبابه من تمر زفة نوارس
فاهية چفوفي من أهد ذاك المگاود
انا و انته...
شمعة فوگ الگمر چنه
و من تطفي ضويات المدينة
نشعل الظلمة بعشگنه
ماكو منك
و لااكو منك...
وين أكو ابن آدم على زنوده محطات النده
جانت رسومك تكد اعله النفس
و جان صدري يستراح بضحكة منك
جيسني و شدني بقميصك
يا ضريح الراقصات
العمر لو شحّ اليگوده يموت فاهي
خلاف وجهك
صبخه صارت گاع روحي
و شبحت عيون السنابل و الگطا
و ما رسه للحنطة لون
كافي تنذرني متن لهل البيارغ
مالي حيلك
لا انته معبرني من ليل المحنة
و لاني مستاهدلي ريل يسافر
الباجر شمس
وين ما صَحّ سجة تفضحني صورّك
مدري ياهو الشمر بيه سر حمد
كون ماخذ ديرتك
جا وين أعيش
الما يشد شوفه بگصيبه
تفحط عيونه الأغاني
و يگظي عمره بلا هوية و لا وطن
يا غريب الگال محراب القصايد
ما يشور
يا حريمة و تايبين و حاسبينك
ذني تاريخ بسماوات العشگ
و انت أول عشگ تارسني
حزن
ما أسامحك..
انت أول عشگ تارسني حزن
ما أسامحك..
ناصر البدري
رد مع اقتباس
