(شــريعـة شــوگ)
منو ايردني ورى بنادم
وادور وين چان آدم
حلم لو روح لومامش
ولو يستاهل المامش
تبللت بعطش مشبوه
وانشمرن ستايرهم على عيوني
وخذاني الشوف يم الله
ولگيته شگدحنين الله
من روحه مواسم چملت روحي
وعثرت بمستحاي وصاحلي اسملله
وطحت گطرة ندى اعله شفاف عطشانات
واتبديت طيف بصفنة جنازه
مراسيمي حلم تفاح
والسفره وجه وعيون
بيهن كل رمش عاثر
واوگف على مكابر كل صنم مهجور
انشده وچم نبي بخلگي لسفرباچر
يفجر اتراب؟؟
وين انسانك امهاجر
وارد مني واجيب وياي
صوغة بچي من البرزخ
واذب حزني اعله المرايات
حتى الگه بسبيلي شچم حلم عابر
يجرف الليل
رد وجهي الرسمتي اعليك
اريد اذكر تفاصيلي
رجعلي ولو صفنه
اعله گداالشوف وابجيلي...
رجعلي وصية موت من عمري
واخذ كلشي بصلات الحيل حتى الخوف
تراني لعشگ كل مذبوح
افك لآخرمنازع باب...
جنت للكلشي ماموجود روح غياب
ويجي بعيني علي
امنختل ورى المحراب
اشكثر صليت!!
بس اسلامهم چذاب
يرب البيت..وين ايروح خطارك
فك لمسامحك بيبان واشبگني
تراني بعازة مراضاك
ماني بعازة الفردوس لونارك
منو ايردني لقميص البير
حتى اتمايز التاريخ وين امسيّر لياذيب
واجيب من القوافل بيعة مكاشف
واجيب وياي شروة چم وفه من الطف
وارد وابچي سما تلالي على خدودي
اعله صومعة النهر خليت
يم المشرعه ازنودي
نذر مكسوروالوادم خذو كلشي
الدروب هواي بيهه وجوه
مدري منين
اخاف اعثر حبل ورگاب من امشي
المشانق تارسه ضنوني
وصليب الخوف
تارس خاطره برمشي
وحي انساني يسولفي اعله كل نجمه اتراوالي
الدرب محسوب
ليش ابچي اعله چتالي
وليش اعطش شريعة شوگ
وانه ادري النهرخالي
ومدام ادري بعشگهم طيف
شلت الناس من بالي..
وسام سباهي
رد مع اقتباس
