((حلم مهجور))
ياعمر يادنيا ليل.....
ياخدر كحله على جفون السمر
...بيك تهنا ومادرينا الصبر وين..
كلشي ليل
ومامش بوجهك ولارصعه فجر
يالمكاسر خجل فاهي.....
عدن اسنينك وعود وامنيات
وخمر واشباح وضنون..
والحلم مهجور عدنا
وهايم بكاعه الجنون....
احنا نسكت من يسئلونا على ايام الشباب...
الشباب الصار جبهه وينحت بوجهه الخراب...
الشباب الصار سجه وجودر بوجهه الضباب...
الشباب الطعمه صاير شربت
بنكهة غياب..
ومره نسأل هم يمر بينا الحساب..
واحنا مانعرف تفاصيل الحرير
احنا تعتك كل هدمنا
وهو مخمل باقي عدنا
ناعم انسميه ضمير....
واحنا مانعرف شيعزف موتزارت...
احنا نسمع امنا عالتنور تعزف بالخبز الحان موسيقى الشعير.
احنا احلام الرغيف
احنا رواد الرصيف
العمر فات وشفتهمنا
عرفنا بس سورة الفقره.....
ومن يضكنا الليل نركض
نقرا آيه من الحصير.....
ياعمر يابو السواد..
بدرب صبحك كاعدين
وكلهه عدت ..
ماكو بياع النهار.....
احنا ذنيج الحدايق لورحل عنهه الخضار....
احنا ذاك ألي يتاني وصافن وماكو قطار....
ياعمر يامدري وين.....
عدن اسنينك فراغ ويسرح ابوجهه الشحوب..
ولاخلك ويطول عدنا
ولامكصرنه الدروب
ولامكصرنه الدروب.
علي عدنان خليل
رد مع اقتباس
المشاركة الأصلية كتبت بواسطة صاحبة العيون العسلية
