ردت أشتري من الله الهوى
( ليلة گدِر )
ودّيتلچ وي الگمر ديرة هلا
او رفّة خواچي أو مستحه او ريحة نثايا مهلهله
او ردتچ تجين إبضحكتي أو ما صحلي طارش للنذر
أو ردت أشتري من الله الهوى وأشرب روازين العمر
يمرايتي الليلة گدِر ...
حلّيتلچ ميّة ظفيرة او لا شفت خصلة فجر
أو صلّيتلچ ميّة نهد لمّن غفه إبجفي الخِصر
أو غنيتلچ كلّ القصايد و الرسايل والمواويل أو سوالفنا الشِعر و المو شِعر
يمرايتي الليلة گدِر
او باچر يمر بينه العطش و إنفرفح طويرة عتب ما أظن يكفّينا صبر
و آنه إعله باب حجايتچ بلكت حرف يترس قصايدنا خمر
بلكت تمر نسمة صدگ تفتحلي شباچ الجدايل وأنتظر
يمرايتي الليلة گدِر
و آنه نبي أو متعوب من ليل الوِتر
صلّيني بأحضان الشَفع خل أنتچي
تدرين المرايات تطفى إبلا وجه يمسح تجاعيد البچي
أو تدرين الولايات تغفه ابلايه شاعر يعلگ شموع الحچي
وآنه شاعر ...
عبد الوهاب الحمداني
رد مع اقتباس
المشاركة الأصلية كتبت بواسطة رقة الورد☆
