الليل سالوفة عشگ
حزمينة ألحنطة حدر خصورها
ودلعينة صدورنا المنثورها
جور يالمنجل على خصور الذهب
يلي كل بذرة چنت ناطورها
هبت اليالينة من عزها مسچ
والسنابل طشت ألها ابذورها
وعمرينة الليل سالوفة عشگ
عكس مالفنجان يدور ، ندورها
ولو طفت جمراتنة ، عيون الزلم
تحضن الدلة وتوفي انذورها
ويامه عز اسرار ، خباها ألگلب
حسن الاسواليف فض مستورها
"حنة سرحنة بمذارينة گذلتج ياشمس"
حنة مذرانة يجيب نجوم ويودي عرس"
والليالي تعيش ذلينة الليالي
تعيش سابگنة الرياح البالعلالي
"وطوگينا انحورها"
وبكر الحاصود وي طرة الفجر
وي تاله أتهز فرح عصفورها
شله حاجب لا الفخاتي ملكته
بطوگها ، ولا نجمة طفت نورها
وتفرش النسمة ضحكته للشمس
مفرش الطفلة بشليله ايدورها
تبتسم له ويلوي رسنه من الهوة
الدنيا ضحكتها وحلاة اشهورها
سره يتنفس اگذيلة مهرته
وطيب برية ، أبدوية عطورها
وحين ياخذ من عروسه خبزته
يلگة چفهة اعله الخبز وسرورها..
مظفر النواب
رد مع اقتباس