هنا

[فقار الكرخي]

تشب بيّه الشمس مهرة صبح شگره…
تغيب وتشتعل بالماي روحي انذور للگمره
واگلك وين يالساجي التعب بالنوم طيفك خبزة الفقره
چنت تلمع عله عيوني والمك… ..للعطش گطره
وتجيني اگدار هلهوله واظمك صوغه للثوره!!
واظمك للعشگ ليله جنوبيه.. وشمال تشب مواويله بزلف شگره!
امس گتلك رمل نتطشر ويه الريح? گلت نلتم لوَن تغفه برمل گطره..
وامس گتلك مرايات التراب اوجوه.. گتلي مرايتك سمره!!
وگتلك عطش گاعك لايفيض ويشتعل لونك.
وگتلك لاتغنّي اعيون ناسك خاف يبچونك،،
واخاف يجيبك البينه وصليبك يندل امتونك!
ويشوفونك وطن مظوي. ..
الشعب حزنك البعيونك
التعب شباچه بعيونك..
الدمع لمعة سنابل تظوي بعيونك..
الفرح بوسة صبح ترگص عله اعيونك..
السهر نجمة صبح مكتوله بعيونك!
وشرايعنه تغنّي بمايهه الغبشه… شمس ماتنطفي بالمي..
ويمر طولك مهر يظوي وخيالك مشتعل بالفيّ!!
وخيالك ااااااااااه يخيالك
يمر بينه ظوه وتورّد الحيطان..
عرس غبشه وشبابك عاشگه الگيعان..
وتعلمنه الغنه بالروح… روحك بالضباب توچد البيبان..
وتعلمنه… .مثل كل سنبله ابنادم يطگ بالماي والتربان!!
ومثل ضيعة نفس ظعنه
الصدگ وكت الدغش دفّان..
الصدگ بالمستحه قرأن…
الدرب روجه تودينه رسايل تنقري بنهران..
بلچي تجيبك النهران،،
بلچي تجيبك الغيمه حلم مزنه عله البيبان…
واگولن يمكن مسافر واغيّم وامطر اعتابي..
وتجي وتنفض تراب الغربه يم بابي..
ويسبگني الخفگ للباب
ورماد اخر جگاره مطرز ثيابي!!
واگول الحلم موجذاب..
هذا انته وترابك يشبه ترابي





مصطفى الخزاعي

[سمراء من قوم عيسى]

أنتقاء روعه