هنا

[(حُر)]

فتحت ماسنجري ذات مساء .. ووجدت رسالة تقول : ( أضفني ضمن قائمة أصدقائك .. فأنا فتاة وأكتب بخط وردي .. وأقول امممممممم اذا بغيت اتميلح .. وضحكتي بنّاتيه وناااااااااعمه من نمونة ( لوووووووووول ) ورومانسيه بشكل ما تتصوره لدرجة ان البعض يظن ان خدودي مصابة بداء المشق .. بينما هي حمراء بسبب الحياء ولا شئ غير الحياء ( إلا كان قبصة دلع من أمي الله يحفظها ويطوّل عمرها على الطاعة ) ) ..



ما صدقت خبر .. قمت أضفتها وأضفت كل اللي الجحوش اللي صفو معها ذيك الليلة ( كرمان خاطرها ) !! << سمرقندي في لحظة حب ويلبس القميص الشامي !!


بدت ذا البنت الرومانسيه .. كل شوي تحط وجه مستحي أو قلب منشلخ .. وكل محادثة تغير اسمها وتمحط لها ببيت شعر أو بيتين من بيوت ( نزار قباني ) ذلك الشاعر الداعر الذي خلخل صواميل البنات .. وجعلهن يتسدحن في المقاهي البيروتيه وكل وحدة تطلب ( فنجان قهوة مع قطعتين سكر ) !<< الله ابو ذا النزار هو وكاظم !! كلو علينا الجو


قلت .. حياك الله يا بنت !! <<< تحسون اني قايلها بين الضيوف في مسلسل بدوي

الحقيقة انا انسان أصير خفيف مع الضحكة الوردية ( لووووووووووووووووول ) وأحس انها ممكن تمتزج بصرقعة لبانة !! <<< كناية عن الغنج والدلع واللزي منو !!


أما ذا الضحكة ( خخخخخخخخخخخخخخخخخ ) اذا صارت بخط اسود أو أزرق أحس انها صوت خشخشة قرطاسة سمنت ناشبتن في شبك !! <<<<< طرّاه ان ذا النوع من الضحك تمساحي المولد والمنشاء ويتأثر بشعر الشنب !!


طبعن .. بعد عدة محادثات مع فتاتي تلك .. وبعد دراسة وتحليل لشخصيتها وقبل أن أتهور وأعتمد على غريزتي الفطرية التي تعاني من ندرة الأمطار !! والجفاف !!

حطيت في بالي انها مثلها مثل غيرها مجرد ( كي بورد .. وحروف ) واعتبرتها مجرد ضيف جديد .. ولا بد أن تخضع لفحص الجودة والنوعية ومطابقة المواصفات والمقاييس البنّاتية في الشبكة العنكبوتية !!


ولم تكن مفاجأة لي أن أكتشفت ان هذا الضيف محتاج إلى اضافة حرف ( هـ ) في أخره <<< يعني في أخر الاسم .. لايروح بالكم بعيد

وأنها بنت صدقيه ومهيب تمساح يتميلح ! << والله يا ناي تعبت تعب عشان اكتشفها .. مع اني اعتبر اكتشافي لها مهوب اكتشاف وانما ( كفشة ) لأني كفشتها بعد عناء وصراع مع ذاتي ونتيجة مراوغتها ( الله ابوها كأنّها ابو يعقوب وانا حسن حمران ) !!

فبعد مراقبة لصيقة ( مان تو مان ) استمرت حوالي شهر .. تمكنت من الحصول على الدليل المادي اللي يثبت انها ( خلف جداني وبعد طوافي ) !! << عادي ترى أنا مثل أي شاب ريفي حبيّيييييب ! وفيني شلقة عواطف تيزي أهل بغداد كلهم

الدليل ببساطه .. بسيط .. وهو اني لقيتها ( اون لاين ) وقت صلاة المغرب لمدة أسبوع .... وعقب ذا الأسبوع صارت وقت الصلاة تكتب ( برب ) !! <<< تعرفون وقت صلاة المغرب فوّات

^
^
الله يعفو ... قاعدن كل ذا المدة .. وأنا أصلي المغرب مقابل الشاشة .. عشان ما تفخت عن عيني وأتخوبر !! << كفانا الله وإياكم شر كل الخوابير !!

طبعن عقب ما تأكدت أنها بنت .. خشيت في عينها .. وقلت : يا بنت الناس ترى الناس طلعت على سطح القمر .. وأنا معك ما قدرت أوصل إليك !! << ثقافة سرسري


ما تلاحظين ان العالم دخل في عصر العولمة .. وعصر الشبكة العنكبوتية وكلش صار عبارة عن بيانات ومعلومات .. صح وإلا أنا غلطان ؟!

قامت ومزعت ذيك الضحكة اللي من هنا إلى هناك ( لووووووووووووووول )!

صراحة ارتفع ضغطي .. أنا متحمس يقال لك بتكلم جد وهي تضحك ؟!!

يوم شافتني أهوش عليها .. اعترفت إنها كانت متعودة تضحك معي وتحسبني انكت ! <<<< شف عاد العذر !!

إثرها كل ذيك المدة مهيب تقرأ خنبقتي !!

وكانت كل ما شافت دريشة ماسنجري مولعة مزعت ضحكة سفري عشان تسكتني وأنا يا غافل لك الله .. متحمس وقاعد انكت و أتميلح ( الله أبوها ) !!

ما علينا ... الوعد قدام !!


نكمل بعد مانشوف التعليقات ..
كح كح

[عٍآزفَہ آلُنآيَ]

الله يخليكم لبعض

[❀aşk çiçeği❀]

شو اني كلش مفهمت

[(حُر)]

البنت حست اني زعلت وخذت في خاطري .. قامت أعتذرت مني .. و راضتني بكلمتين حلوة ووجه مستحي .. ووردة حمراء .. وقلب أحمر منشلخ كأنّه مقعدة خواجة مطنقس يبي ياخذ حصاة من الأرض ! <<< ( بيني وبينكم حقين ذا الماسنجر ما قصرو حاطين كل الصور اللي تحتاجها إذا بغيت تزحف لوحدة كمخه تؤمن بوجود الحب من أجل الحب ) !! <<<< ما تدري انه فيه حب من أجل حلاوة البقر !

وبعد ذا الاعتذار والقبول مع ضيفتي في الماسنجر .. أم قلب منشلخ !! << جعلي اشلخ سور بيتهم وأطل عليها وهي تشطّف الساحة ودراعتها ترطرط من الماء !! وتهزع عشان ترفع قميصها عشان أشوف قلادتها !!


وعلى قولة الشاعر الفلبيني


ليتني قلادة في نحر هند = تداعبني كل ما هوجست باصابعها !!
واختفي عن عيون العذّال = يغطيني قميصها وحولي دراهمها!!
ما تلاحظون .. شي ... لو الفلبينين دارين ان حريمنا قلبين صدورهم مكاين صرف دراهم


بعد اعتذارها مني وقبولي للعذر ..

بديت شغل العولمة ولحسة المخ .. وفي رواية (غسيل المخ ) .. ونزع الأقفال والسلاسل من على مخها !! << طرّاه الفنانة الأمية الملقبة بالدمية والتي اشتهرت في عالم العفن الفني باسم ( روبي ) اللي كل ما سألتها المذيعة سؤال في مقابلتها الكخة !! << واحد متوهق ومضيّع وقته يقالك بيشوف شي ما مر على مقص الرقيب !!

كل ما سألتها المذيعة سؤال .. قالت : شوفي .. بوصي .. أنا كان على دماغي سلاسل وأئفال .. ودل وائتي خلاص .. شلتها !! ( ليتها على طمام المرحوم يا روبي ) <<< سامع ان لها يوزر في الاقلاع ويبي كودها ترجع عن أقوالها وتتوب !!

بديت شغل البكش مع ضيفتي في الماسنجر .. وهات يا غسيل ودعك في ذا المخ الين قلب لونه .. وكلمتها عن المجتمع في الغرب وكيف انهم قدرو يوظفون الإنترنت لتسهيل حياتهم وصارو يتقضوون مقاضي رمضان من السوق ولا يقفون ساعات عند كاشير اسواق العثيم ولا هم يحزنون !

وكيف انهم بالإنترنت يزبطوّن حجوزات الطيران والفنادق .. ويزينون كلش بالنت !!
وبعد أخذ وعطاء .. ودردشة .. في ذا الشي الجديد علينا .. قلت لها وش رايك ؟

قالت : وشو به !!
قلت : وش رايك لو نخربها ونعرس أنا وأنتي عن طريق النت !!
قالت : بس أخاف تدخل على أمي .. وانفضح ! << شكلها فهمت معنى ( يزينون ) بالمفهوم القروي البحت ! وما استوعبت الموضوع ( ما يخالف ) !!

( الحقيقة سوء الفهم بين الناس ممكن يؤدي إلى كوارث ) !!


شرحت لها من جديد اني مستعد ارتبط بها وأعرس عليها صدق ! << تخبرون الواحد اذا صار فاقد حنان .. ممكن يتهور ويرتبط مع أقرب سيرفر ( يبالك بنت مدلعة وتتأسف بقلب منشلخ ) !! <<< آآآآآه ( طالعة من قاعة الكرشة )!!

ردت علي بسرعة وقالت : برب !<<<< بيني وبينكم أنا فهمتها على أساس إنها .. يعني كل تبن !! بس بأدب شوي !!
صكيت الماسنجر .. وفتحت الأنستا .. !! << العوض ولا القطيعة !!

وزي العادة .. بتل برنامج البال توك معلّق لا هوب اللي فتح ولا هوب اللي قال : معليش يالشيخ .. دور غيرنا !

قلت خل ارجع للماسنجر وأحذف ذا المتخلفة اللي عييت تخليني اوخر ذا السلاسل والقفول عن مخها !!

يوم فتح الماسنجر معي .. والقها منسدحه في الباب !! << بغيت أوطاها قاعدتن في صاير الباب مررررررره !!

بادرتني بالكلام ..
وقالت .. يا حبيبي .. سلام سلام !
أنت العشة .. وأنا فرخ الحمام !!

ضمني ..
حبني ..
انا لك .. وانت لي !!

انا موافقة على فكرتك ..
وابي أكوي غترتك ..
دلني درب غرفتك ..
لا تخليني وحدي .. أنام !!
^
^
صراحة عقب ذا الحتسي .. حسيت انها بزر !! اجل قال ايش قال : أكوي غترتك !! ( ما تدري ان غتر المعرسين ما يضبطها إلا المغاسل ) << لا خلاء ولا عدم !!

بغيت أهون عن فكرة الارتباط وأخليها تعارف ودي ! والعب بالصف الثاني وتصير سوالف عن هوشات المدارس وارتفاع الأسعار .وما الي ذلك من سوالف لغرض تقطيع الوقت . بس خفت تتحطم البنت !!


قلت لها : خلاص يا حبيبتي .. أنا بدخل على موقع أهلك و أسجل بيوزر جديد واذا تفعّل يوزري ان شاء الله . . أول شي بسويه .. بعرس عليك !! << واحد يحسب العرس بالإنترنت نظام يوزرات !!

انا قلت سالفة اليوزر وموقع أهلها من هنا .. وهي بادرتني بعبارة ما زالت ترن في راسي الين الحين

قالت لي : بنز .. أدري ان نيتك صافية وانك تبي درب الغانمين ! بس أنا مرتبطة بواحد ثاني !!

^
^
شكلها درت ان ما في الحمض أحد .. وصرّفتني

طبعا .. كان هذا .. اتلى علمي بذيك الدريشة الخضراء .. في ماسنجري المتواضع !! فلقد .. فعلت ما لم يفعله أباطرة الروم .. ومزعتني بـ( بلوك & دلييت ) وكأن شئ لم يكن !!


ما يستفاد من الموضوع :

1-ما عاد فيه سلاسل وقفول على مخ ( روبي ) !! << على ذمة ( الشو تايم ) !!
2- الماسنجر .. ممتع ونافذة على العالم .. بس لا تصير ذا النافذة واجهتها غربية ثم تاكلك شمس الصيف ! وعاد ينفع المكيف !!

3- الزواج بواسطة الإنترنت .. ممكن .. اذا كان هناك نضوج فكري ! ورغبة صادقة من الطرفين !!


4 - مهوب كل من ضحك ( لووووووووول ) بنت ! ولا كل من ضحك ( خخخخخخخخخخخخخخ ) تمساح !! << فيه بنات يضحكون كذا !

5- القلب المنشلخ حيلة العاجز عن التعبير ! << طرّاه نانسن ساقطة في التعبير ومع هذا تتلاعب بمشاعر آوادم !!
6- العرس مهوب كوي غترة ! << طرّاه الأحلام الوردية لبعض البنات !

7- ملاحظات بسيطة ممكن تكشف هوية المتصل بالماسنجر ! رغم الحلوف والأيمان الكاذبة اللي تسجل عليه في كل محادثة !! << عجبي من هؤلاء القوم .. كيف هانت عليهم أنفسهم وحبسو أروحهم في أجساد غيرهم !! ( البنز في لحظة تفكّر ) !!

أنتهى .................

[(حُر)]

شو اني كلش مفهمت

هو بطل هالقصة فهم شيء حتى تفهمي انتي .؟!

روحي نامي ابرك ..؟!

[قـَســم ✞]

هسه تزوجتو يو لا ؟

[(حُر)]

هسه تزوجتو يو لا ؟

شكلك ماقرأتي الأ العنوان <<< توه يذكر ( خشة تغمز ) ‍‍

[قـَســم ✞]

شكلك ماقرأتي الأ العنوان <<< توه يذكر ( خشة تغمز ) ‍‍

شوية كلامك م مفهوم فمااعرف لهجتك كلمة افهمها و10 لا

[نسمة المساء]

الله عينها وعينا وعين صوابعك على كتابه وقريت ثلاث مرات ياله فهمت بس حلو نقاط الافاده من قصتك
براااااااااافو

[نسمة المساء]

بس مرورتك لاتفتح ماسنجرك بعد في ذات مساء افتحو في ذات صباح وارحم جد ام دنيا
للمزاح صديقي