( ريشة )
ما حنّيت ... ؟
يا اول عشگ
فك عينه گلبي اعليه
وبغيابه انعمه وسلّيت
*
ما حنّيت ... ؟
ما عذّبك عش مهجور
ظل بالبيت ...؟
*
ما حنّيت ... ؟
ما جيت اعله بالك يوم
لو حتى بحلم
وتندّمت فزّيت ... ؟
*
ما حنّيت ... ؟
ما جاسك بَرِد غربه ، ورجف گلبك
وبچانون ذكرى ايامنه تدفّيت ... ؟
*
ما حنّيت ... ؟
ما ونّت حمامه هناك
وذكَرت احباب
حَي ميّتهم ، وحَيْهُم ميت
وبكسران خاطر يا ترف ونّيت ... ؟
*
ماحنّيت ... ؟
ما مر وجه من وجوه الشفتهم غاد
وبعينك انا اتْراويت ... ؟
*
ما حنّيت ... ؟
ما هزّك غِنَه حضيري
ولا داخل حسن
وحسين نعمة
وغنوة ال ردّيت ... ؟
*
ما حنّيت ... ؟
ما أذّن الشوگ البيك
وليام المضن صلّيت ... ؟
*
ما حنّيت ... ؟
ما عرضت ابّلعومك
لگمه زاد ... ؟
حِسْوَت ماي ...؟
استكان الچاي طاح من ايدك وحسّيت
وگلت وي روحك اش شويت...؟
وحگ عيني التشوفك طير
شما تبعد أگولن جيت
واذا ما جيت
كافي اعليّه احس حبّيت
وحلف لك
وحگ رب العرش والبيت
غيرك يا شريج الروح ... ما ثنّيت
***.
م
رد مع اقتباس
