هنا

[#ولاية علي افضل#]

شوفي حبيبي خلي اسولف لج
صح اللي م داخل خصوصي يعتمد ع المدرسه بنسبه كبيره نكول تقريبا ٩٥٪؜ على المدرسه

بس شوفي خلي احجيلج عن تجربه
اني عايده السنه والسنه الاولى جان معدلي بدايه السبعين ع الرغم مدرساتي احسن مدرسات بس شنوو ؟؟
اني اللي مجنت ادرس
السنه الثانيه م اعتمدت ع المدرسه وكذا .. صح ماكو استغناء عنها بالنسبه الي لانو احس انجبر ادرس للامتحانات وهيج بس اني جنت ادرس لوحدي لانو اني عندي رغبه بالدراسه اني اريد ادرس بأي طريقة
هنا اني جنت الي رغبه ادري ف خلي عندج رغبه بالدراسه عاليه وانو تطلعين معدل باعتمادج ع نفسج
لتحبطين نفسج بالكلام السلبي مال معندنا مدرسه ، شرح مو زين ...الخ



شوفي خلي احجيلج مختصر شلون حنت ادرس

جنت داخله خصوصي رياضيات وكيميا ع النص وكل مراا اقراهن خااصه الفصول الاولى اعيد واصقل الاعاده كلش مهمه وهاا تحلين بايدج وبلا ما تباوعين للحل مال ملزمه اوك !
جنت كل نهايه اسبوع اقرا الفصل اللي دا ندرسه حتى اذا بعدنا ما مكملين هالفصل
وهم جنت اقرا ع اليوتيوب
ومشتركه بقنواة دراسيه ع التليكرام
تحضير يومي هذا منتهين منه لانو وما اعوف اليومي على مود الشهري لانو لوما اليومي ما اطلع درجه بالشهري
والمدرسه اللي مثلا عندها دوره ومتداوم اسبوع او اجازه مرض او كذا وحدي اقرا الماده مالتها وكانو دتاخذنا ودناخذ تحضير يعني اذا عندنا درسين ومتاخذنا بيهن اقرا تحضيرين لوحدي
بس انتو خلو عندكم لنفسكم همه ورغبه بالدراسه وحتواجهون المستحيل والله


وللفائده الج الانكليزي اشتري ملزمه اخلاص اكرم واقريها بس هي واضمن لج ال 100 بالانكليزي تغني عن الملو والستيودنت بوك لانو هي دامجه الكتابين + قواعد + اسئله اثرائيه وشرح مفصل للماده وواضح ومفهوم يعني بوجودها لتباوعين للكتب مال انكلش وسعرها 10 الاف


ورياضيات شرح قناه دروس شرح الكتروني ع برنامج نسيت اسمه يحجي بيه واحد اسمه محمد جابر اعتقد المهم يعني ميطلع شكل اللي يشرح حتى تميزيه عن غيره
والكيميا هاشم الغرباوي وفصل التناسقيه ع مهند السوداني
ووراثه قناة طالب عراقي اختي تشرح بيها

وهذني يعني عن تجربه دا اذكرهن اني دارسه عليهن


بالمناسبه قنواك التليكرام بيها شرح كلش حلو خاصه قنواة نيمار ومسيرتي في السادس
بحيث اللي معنده مدرس او ميفهم ع مدرسه يفهم من شرحهم سوي تليكرام وادرسي وياهم حتى امتحانات يسوون
وبما انو انتو هيج فارغين ومعندكم ولا مدرسه انتو خصصو بالجدول مذا يوم ندرس بيه كذا ماده والطالبه اللي فاهمه وداخله خصوصي او احد مدرسها تكوم تشرح الكم الماده اللي م فاهميها يعني فلانه زينه بالكيميا تاخذنا بالدرس الثاني يوم الاثنين والدرس الاول الثلاثاء لانو شاغر وفلانه اللوخ تدرسنا مذا ماده اللوخ بيوم الاثنين الدرس الثالث والرابع لانو شاغر ويوم الثلاثاء ثالث درس لانو شاغر ...الخ .. وصلت فكرتي ؟

اذا انتو محد ديسمعلكم انتو سور لنفسكم حل ليش تبقون مثل اللي لا حضت برجلها ولا خذت سيد علي لا انتو من جايتكم مدرسه ولا انتو من دارسين ..

وترا هالطريقه اللي ذكرتها مفيده والله اني هسا من دخلت جامعه جربتها لانو الطلاب كلنا دنعاني لانو مواد جديده ف غالبا من عندنا شرح مهم وما فاهميه الفاهم يكول يابا اني فاهم ولباجر اشرحلكم ودنستفاد يعني ونفهم ف لتعتقدين انو اذا طالبه درستج محتفهمين منها لا بالعكس الطالب يوصل المعلومه للطالب اسرع .. ف اللي فاهمه خلي تشرحلكم


اخدموا نفسكم بنفسكم وانتو افتحوا الكتب بنفسكم ادرسوا وحدكم بالبيت وع اليوتيوب والتليكرام وبالمدرسه سوو حلقات دراسيه وتوكلوا ع الله


اني بكلامي هذا دا انطيج حل الج ولصديقاتج لا اكلج ناشدوا تربيه ولا سوو هوسه يم وزاره ولا شي لانو دولتنا ميطلع منها شي بيه خير يفيدكم عاد انتو فيدو نفسكم

وادري حجيت هواي بس على مودج ههه


ويارب التوفيق الج ولجميع طلاب السادس
وأي سؤال اني بالخدمه تكدرين تراسليني ع الماسنجر مخليته بمعلومات ملفي وممكن اساعدج اذا اتدكر الشي اللي سألتيني عليه وما اقصر




..

مشكورة

[#ولاية علي افضل#]

[#ولاية علي افضل#]

ما حصلنة شي من بس وعود هسة حصلنة على وعد جديد من استاذ منتهى وأستاذ غافل

[د. حسن سعيد]

يجب أن تسمى وزارة التردية والتهديم لا وزارة التربية والتعليم، أي سخف هذا مدرسة صف سادس اعدادي بلا مُدَرِّسات؟!! على كل حال اقرو على يوتيوب وتخيلو نفسكم طالبات خارجي، بس هم بقت مشكلة ما دام انتو طالبات بمدرسة يعني لازم يمتحنوكم شهريات ونص السنة يعني لازم فد 3 مُدرِّسات على الأقل يشرفون عليكم، احسن شي اتصلو بقنوات معارضة للحكومة مثل الشرقية والبغدادية وقنوات مؤثرة مثل السومرية وnrt arabic سجلو وياهم لقاءات لأن الحكومة الجبانة تخاف منهم خاصة الشرقية يرجفون منها رجف مثل رجف الجريدي من يشوف البزونة