قصيدة نصيحة
قصيدة نصيحة
صفّي ذهنك دوم حتى تستراح
وابدأ ابتصفيته عقلا وفكر
سوي عقلك دفتر امنظم جميل
واكتب اهمومك عليه حسب الكبر
وابدي عالجهن وسويلك حلول
حتى لو تتأخر احمل واصطبر
لا اتحلهن جمع كلهن مستحيل
مثل شدة العصي ما تنكسر
السرعة مو حلوة تره بكل الامور
والركبهه صابة زلات وحفر
ابدي بيهن وحدة وحدة واستشير
وتدري كلمن شار ماخاب وخسر
شوف ربك كال بكتابه الكريم
بشر المسترجع او كلمن صبر
وادعي حتى ايصير الك احسن سلاح
واذكر او صلي على خير البشر
ينشرح صدرك او يرتاح الدماغ
همومك اتصفيهن ابكل اليسر
اوكف ابوجه المصايب والهموم
واحمل الصعبات واقبل بالقدر
وحجيك المزيون لا تندم عليه
من يغرد الطير ما ياخذ اجر
لا تجمل وجهك او تتعب عليه
جمل اخلاقك اتصير احلى البشر
لا يغرك زين بأول شدتك
الزين كون ايصاحبك طول العمر
السكته بين الناس مابيهه ندم
بس كلامك احذر ايشبعك قهر
من تجادل شخص تعرف محتواه
تشوف منه الزين لو باطن غبر
ما ترضّي الناس لو مهما اعتنيت
تفشل ابدنياك ويصيبك ضرر
التكبر شيمة الشخص الزغير
والتواضع ينوصف بيه من كبر
لا تخلي الغضب ايصيطر عليك
هية لحظة غضب بس تندم عمر
الفشل مو عيب واعتبرة دروس
حتى لا ترجع عليه كل الدهر
لا تعيب الناس وانته البيك عيب
عدل اعيوبك كبل لا تنخسر
احذر اتكسر كلب كلمن هواك
الكزاز الينكسر ما ينجبر
الجرح بالجسد ما يصعب دواه
والحجي جرحه قوي وما يندثر
لا تصفك تمدح الجالك غريب
من كبل لتجربه وتشوف الدرر
اسماعيل القريشي
20_4_2016
رد مع اقتباس
المشاركة الأصلية كتبت بواسطة زنـہوبـہهہ
