عالحواجب يلعب الشعر الحرير
اخاف من عندي اخاف
وخاف ما اكلك
اخاف نضل نخاف!!!
وبين اخاف نضل نخاف
يزغر براسي السؤال؟؟؟
وتكبر الليش ابلادي
وره حايط احتجاج
اكبال شارع من اماني وحلم زيبك بين اديه
حلم زيبك انوب يركض عاليمين
والعراق امبيت بجف اليسار
ونوب يركض عاليسار والعراق مجتف ابيت اليمين
ومدري ياهو يصيح بات في عراقك ياحسين؟؟؟؟؟؟؟؟؟
انه رايد رب عراقي
رب عراقي يحبني حيل
رب عراقي وياي يلعب مثل مايلعب علي وي اليتامه
رب عراقي اله بكل شارع علامه
طفل يحضنله حمامه
شفه مليانه ابتسامه
رب عراقي يترس جيوب الفقير وكلبه عالمحروم جامه
انا اريدن رب عراقي ينزل بقرئان شعبي!!!!!
ينقره بطور الونين
طور اهلنه يداوي جرحي
لان قرئان الفصيح من قرا طور الحجازاتئول وافتى........
وانه ماجايب جديد
الك رب والي رب
والمثل واضح صريح
ارد اعيش
لا اصير بيوم سياف الرشيد وكافي امثل بعد عبد الله الذبيح
ارد اعيش
وابني بعيوني مدارس للزغار الكبرت ابستان خوف
وارد اغني.للحبيبه.حاسبينك نعدنه
عالحواجب يلعب الشعر الحرير
وعالشواطي شلون تتلاكه الجفوف
ارد اغني بلايه اه بلايه ليش بلايه اوف
وارد اغني للحبيبه ارد اغني
وشلون اغني؟
للحبيبه التفرز البيكي سي من الصوت عن السننوف
الخوف يعدي
وللفرح بيبان عشرة منين ما ردنه نفوت
ننحصد بالاربعاء نخضر براس الخميس
ونترس الشارع لعب
ونكلب الدنيه هلاهل من تمر زفة شلب
ذيج بحضان التريده ذاك عاشك من زمان .هذا يتمرن يحب
ذوله احنه
ما نطيح
فراش مانرهم نصير
غطه عشنه اعمارنه
نبلط دروب الجفن للاتي من اعمارنه
نعيش كعبه يطوف بينه العاشك نجمله ذنبه
ونرسم الدنيه فراشات وضوه نكطف محبه
انفلش التابوت من اعتابنه
ذوله احنه.مانطيح
شما شربنه البحر بعده الروج عالي مانقص
وكش ملك بين قراصة ضفيرة بلبل وشفة فراشه
وبينسيف وسوط بيبان القفص
التحدي قائم بهاذي الحيات
وحاضرين شوكت مادك الجرس
والفرص كلهه متاحه للجميع واحنه قناصة فرص
نوفل الصافي
رد مع اقتباس