قصيدة تغيير المنكر
قصيدة تغيير المنكر
يتغير المنكر بامر رب الكون
والواجب علينه نقوم بالتغيير
غيروه ابئيديكم هذا اول راي
والراي البعدهه باللسان يصير
واذا ماكو بگلبكم اضعف الايمان
على كل من طغى وما يحسن التدبير
ثخنت والبلد ساده الظلم والجور
اكثر من گبل ما اله كل تعبير
وعدونه بفرح وبحال احسن حال
تاليهه گضينه العمر بالتگطير
حصتنه گبل چانت اتغطي وزود
من ارقى المناشئ تكفي بالتقدير
هسه تقلصت بالعدد مو بانصاف
والجيتهه گمنه بالدعاء انحير
اسالة ملوثة ومالح يجينه الماي
والتصفية صارت النه هم چبير
بالموطن نفط من زاخو حتى الفاو
عل ذهبات لازم كل شعبنه يسير
گمرگ وضريبة ورسم واستقطاع
وانواع الموارد وين جاي اتطير
ماشايف هدر بالمال مو بانصاف
بوگ وحول فلوسك يبو التحرير
حررتو البلد حسبنه انتم عون
فرعون انتو طحتو بالشعب تدمير
وين الكهرباء وشنهي قصة الماي
ليش العاطلين اتشبعو تخدير
حال الكهرباء من اردأ الاحوال
صارلهه عمر ماتنعدل وتصير
شنو بيهه صعب گلولي خل ارتاح
شتكلف الوطن بالنسبة للتصدير
تصدير النفط والعدنه من خيرات
كلتكم غلط من عدكم التقصير
راعي الخدمات وطور الاحوال
مو تغليسة وتگول الشعب بالجير
وين تصرفت اكثر المليارات
ماتنعقل وين اندفنت بيا بير
خل احچي الصدگ بالقدروه الناس
حصة كل فرد بيت بأقل تقدير
من ارقى المنازل واجود الاثاث
والتصميم كل الدنيا بيه اتحير
واعمار المصانع احسن الاعمار
واصلاح الاراضي من وره التبوير
والتعيين يشمل كل فرد عطال
ويزول الفقر والعوز والتهجير
حتى الكهرباء اتصير بالمجان
كل ارض الوطن تنشمل بالتعمير
كل الخدمات اتصير باحسن حال
بس ماكو خطط لا وعي لا تفكير
بوگ وحرمنه وتهدير بالاموال
واحتار الشعب بالقتل والتفجير
راحت كل ثروتك ياشعب بالجيب
ودارو على فلوسك زادو التسعير
كل حاجة غلت من دون استثناء
والنفطات عدنه تصفية وتكرير
حاربتونه ازيد من حرب الارهاب
واريد من المراجع طلب حيل زغير
فتوى عل ظلم تنسعد كل الناس
نفرح مثل ما فرحونه بالتحرير
اسماعيل القريشي
٢٠/١٢/٢٠١٧
رد مع اقتباس
المشاركة الأصلية كتبت بواسطة فقار الكرخي
