گليبي نسمة شوگ عطشانة لهواج
عيون مشتاگة لضواج
عيوني تاهت . تيهت كلشي التريده
وطلگت كلشي التريده
والتهت تفتر وراج
هوَ شو گلبي اشتهاج
ويا سلام كون اشوفج
شوفة عيونج فطور
وعيد لچانوا صيّام
وكون أزورج حتى اكظ شباج صدرج
وارد احط طولي ويَّ طولج
كون احس طعم الدفو بحظنج يروحي، يدفي روحي
واخدر بحظنج وانام
كون احس طعم الندى بشفتج عسل شفة عروس
وكون اتيه وياج دنيا، بغير دنيا
كون اتيه ، وكون اتيه
كون اعيش بغير عالم
انا وانتِ نغني بيَّ
شگد احبج
انا من طبعي الأحبه خبال بخبال اشتهيه
يا حلم عاش ويَّ روحي
لو خلص عمري بحلم بس ما اشوفج شلّي بيه
عيوني خرسة
ولذّة شفافج عطش
چن روحي متعلمة عليَّ
ارد اجيج
انا بيَّ ذنوب الج گد ما احبج اشتهيج
ارد اجيج، شلون اجيج
وروح كلش بالعشگ متحلفة بيج
تعلمت روحي عليج
واشتهيج
شلون ما اشوف اشتهيج
الشوگ بين ضلوعي طاح
كون اضمج
ايييييه يحنينة اضمج
وين اضمج !؟
كون احط روحي ويَّ روحج واستراح
حتى يومية الصبح اترجى فال
وحتى اتريگ ندى شفافج ريوگ بكل صباح
الشوگ من يآخذني ليج
حتى گمت احجي ويَّ روحي، شلون اجيج
وبيش اجيج !؟
وانا ابشرج ، اسود من الليل بختي
لا سفنية ولا اظن تجري الرياح
رد مع اقتباس
المشاركة الأصلية كتبت بواسطة مٰہٰلٰگٰٰه ہٰٰ۫ ہٰٰ۫
...تسلم احمد عاشت ايدك