قصيدة الى من يهمه الامر
الى من يهمه الامر
مو مقياس المن تنتمي وتعود
افعالك التنطي للقب قدره
مو كل الثمر ينفع ايفيد الناس
بس الغالي لا تبخل وتحتكره
اكرم باللي عندك وبْقدر لمكان
لو طيّب كلامك طابت العشره
داست عل بطن دنياي مو بنصاف
دوس الياسمين ايهيّج بعطره
وشخلانه تتريس علينه وحوش
ما عدنه رحم والعدل ما نذكره
ما عدنه تكاتف يرعب الظلّام
كل واحد البينه حاير ابْامره
كل هذا مرض سلط علينه ذياب
والممروضه لگمه بحلگ كل نسره
رادونه نتفرق حتى ينجمعون
على بوگ الاموال وحصة الفقره
كل واحد حماية وجيش يمتلكون
وتحصّنو جوى المنطقة الخضره
شنو عمي حمايه بهل عدد وسلاح
من الشعب خايف وانته لتأمره
بس عمي صدگ گالوهه بالامثال
اليمشي غلط مرعوب كل عمره
هسه احنه رضينه بس تعال وشوف
اموال النفط كلتهه مطّشره
معقوله تقشف ويه هذا الخير
خل نحسبهه بالميت تعال اقره
كل برميل لو ينطي ربع دولار
مليون المواطن يقبض بشهره
زغير چبير ما محدودة لحصائات
ساد الظلم يمعودين وبكثره
شنو فرق المواطن عن شخص مسؤل
هذا ابن العراق وهذا ابن غبره
نسيت بياكتر انته گبل لتفوز
ياهو النجحك واتنكرت لامره
شنو عيب الشعب لو يمتلك ميزات
حال اهل الكراسي وهاي مو كَفْرَه
هواي من الدول فقره گضوهه اسنين
ماعدهم موارد نفط وتصدره
ماعدهم زراعه وابد ماكو انتاج
عدّلو وضعهم بدو من صفره
كل المستحيل ايسهله الاصرار
كل افرادهم بالقيم معتبره
لا غش لا فساد ولا ظلم لاجور
ماعدهم چذب جابوهه بالفطره
والمسؤول عدهم حاله حال الناس
مايتكبر وبساطه كل عمره
اتّحدو وعدهم كومه قوميات
ماخربو بلدهم على فد فكره
باصلاح البلد والخير والاعمار
قانون البلد ماواحد ايطفره
مسؤول ومواطن عدهم ايد ابئيد
لو واحد ايخربط كلهه تحتقره
واسأل على هاي الدول بالتاريخ
صعدو للسما واولهه للگمره
خلينه احنه متخلفين محتارين
على كل الاحوال ...نحمده ونشكره
اسماعيل القريشي
١٦/٤/٢٠١٨
لمشاهدة القصيدة اضغط هنا
رد مع اقتباس
المشاركة الأصلية كتبت بواسطة محمد مصطفى الموسوي
