صفنتلهه وشفت الفراكَ تاليتة عشگ ثاني
جاي اسمع ونين بـهوسة جروحي
شيطَفي الدنيا اريد ارتاح من روحي،
شنو ذنبي غريب وديرتي احساسي
و شنو ذنبي انخلقت لـ ناس مو ناسي
و شنو ذنبي اديرن غيركم بالكاس
واشرب ناس ما احبهه و صوركم تصعد براسي،
ما عندي الـ ينسيني واكَول تهون عشرتكم
واكَول انسى،
شـ ينسيني وبعدهه تدردم براسي سوالفكم،
واكَول ارتاح،
وآنه الفاتحة تبين عرس يمي ،
من اهد ما فاركَت بالليل ضحكتكم،
تركتوني وشني الغاية،
چا ليش الضميرة انسان ما ينذكر بحچاية.
وآنه من ارد ابيع الشوف،
اتوضه بضوة اليمشون واتوكل عالمراية.
اريد ارتاح،،، يا طير اليبيع جناح؟
هاي الناس خلتني ادور بالسما ولاية..
واطيرلكم عطر مبيوع شابع شم،،
وامرلكم هلا الكَيعان لو شافت فلح تلتم.
واخاف وجوه هاي الناس تخنكَني،، اجيكم بالهوه محزم،،
وانه مابيه لثكَة ليل، اخاف انباكَ
هذاك آنه ضوة ملثم،
هذاك آنه انوخذ لوني ،
من تغيب الشمس بالسما يسافر دم،،
وتمنيتكم،، يللا
الصبع يتمنى كل الناس ما تندم..
ضعت بوجوه وادم ماتعرف تشوف
اريدن عين تلكَاني
واريدن صوت يخدر من يكَول اسمي
واريدن آخ تنساني
مشة عمري لتوالية وآنه متاني
انه متاني
صفنتلهه وشفت الفراكَ تاليتة عشگ ثاني،،
زغرتوا بعيني واحتاجيتكم يمي،،
مرات الوطن خيمة..
الوادم كلمن وضيمة
چنت كَطرة واجت شمس الله باستني وصرت غيمة
اشتهيت اضحك عله جروحي وآرد ابچي
واشم ريحتكم من ابعيد واسمعكم..
اثاري العطر هم يحچي،.
زياد البصراوي
رد مع اقتباس
