شمس الگيظ تحرك روح فختاية
والفيْ بالسواجي ينام
يـﭽوي تراب شمس الگيظ
جدمينك ورﮒ شمام
تعال وياي ... مامش ماي، والثيل خطف روحي
وگلب طيرة نبض محتام
إﮔرب خنسة الناس .. وسكت حسّي
يخجل عينك يالأسمر عام
أكبر تحت عينك عام
وأزغر تحت فيّك عام
وألعب تحت فيّك روح مابياش
والخبّاز أشدّه حزام
بيدينك وانبّع ماي .. بوساتك وأنبّع شام
نبض بالروح والثوب العليَّ ورّد
يالأسمر مستحه وسيّس عسن لا رد
لعب عيني، بلعب ليلك صدر نهّد
وأﮔلك شوف ورد الماي
واعصر زلفي المريّح واشبعك ماي
يسمر لا توعي الروح ... تفضحني وتفيض الماي
خلها ولا تجزيها الزغر وياي
خلها امشابگ العـﮕيد
يتـﮕذّل محبة لكل شواطي تزيد
يالأحنيّن بخت لامك، عرس خضّر بليل ازغار
وصي أمك بعد لتغار
ولك مامش ﮔلب غيري عليك يغار
يلمسومر وحـﮓ عتبة هذيـﭻ الدار
وحـﮓ سـﭽـة رسم جدمك عليها أزهار
عت بيَّ السعف، ريّان عمري .. وياملذ جمّار
تَرس روح الزغيرة من النخل وهواس
وحـﮓ ورد الليالي، ﮔـلادة ومخدّة .. وروايح راس
ما شفتك ترس روحي ولك لمن نسيت الناس
وأنسى الناس... ويغمّض جفن فانوس
وينگط بروحي الماي .. والگذلة الزغيرة
ويا حلاة الخوف ع التوّه رجف ينجاس
بوساتك ينگطن ياس
ترست الثيل امخاذف،.. نمت ع الطين سبّاحة
غفيت بحلمك السهران قدّاحة
وافزن ترسو زنودي وكيحة عيون
واعطن غيظ ... نسوان المحلّة ... وصفـﮕـة إزغارْ الشريعة
وخنجر استوّه لمع مجنون
ماهي تهون يابن آدم ... عليك تهون !
خذني ولا شرف موگد طفة بليلة مذلتنا
يا حوبة شريعتنا ...
ابخت كل من طفه الحنّه
بگلب كل من سطت عينه
يبس عوده الْغدر بينا
ولا يكسر خواطرهم زلف تلفان
يا حوبة شموع المغرب لصوب (الخضر)
وحشة ... ونذر نسوان
هلبت والعمر حزنان
هلبت والبخت حزنان
كانون الأول - 1968
رد مع اقتباس
المشاركة الأصلية كتبت بواسطة ضياء المالكي
