شلت عشرتك دمعه بعيني هالأيام
وين الله ومن اشوفك بلكت أبجيها
تتنادس جروحي من يحّل ملكاك
تندبل من تشوفك صدك راعيها
متفرق ضحكتي وضحكة الجنّاز
اني وياك حتى الضحكه ناسيها
تتحزم عيوني بدمع لو مريت
عالفطره وحكَك ماموصيها
فوك متوني ياخذ راحته التابوت
صبخه وثكل حملك ما يبض بيها
عتبة بيتك تمنيت عدها لسان
حتى تكولك شكَد نايم عليها
ماحركت رمشك من اني مرّيت
واني اشبكـَ ضعنتك من الاكَيها
هاي سنيني بيدك مو طاسة ماي
كلما اديرلك ظهري تبديها
عفتني بنار ياهو الكَلك ابراهيم
والأكثر بالحطب كمت تطفيها
انا تمنيت تخطرلي مقبره عالبال
حتى ادفن ذكراك وما اخليها
عشرتي وياك عِشرت سده ويه الماي
اجي بلهفتي وتدفعني وارد ليها
لتذب لومك عالقسمه والأيام
انت الماردتني القسمه شعليها
احساسك مُرّ كتلك مايطك بي شوك
مثل صحرى تشل جفوف ساكيها
طعناتك بظهري تمرجحن بالعيد
واكولن عيد زحمه شلون ابجيها
بس ليا وكت اظل لهواك شراع
نسماتك تعيل وماأحاجيها
ابتديت من النهايه وياك بس مافاد
اهل مكه ترى ادرى بأهاليها
رد مع اقتباس
المشاركة الأصلية كتبت بواسطة كبريائي قاهرهم
