اشبعد للوطن ونتاني ؟
اشبعد للوطن ونتاني ؟
گضت مزّة عمرنا اعتاب
يبست حنّته و باچر يشيعونه…
يفتر بالبيوت الليل
ماتلحگ عليه شمعة
يالكبار !
الضوه تابوت للماله أهد بعيونه ..
وصل يمنه وشبخنه الماي
لادمعة التسد عازة
ولا ضحكة شمس تگعد برازونة....
يباب الله اِمتحنْ ويّاه
اجاك المايعرفلهن
طفل بس شايل البرزخ على متونه...
يالكبار!
انكسر كلشي بضمايرنا
ورضينه التاج
فوگ ِمن الجثث والوطن يتربّع..
يكاس الدم اجه الكتّال
يشرب
والشرايين اعلى بيبان الرگاب الخضر تتگطّع..
يكاس الماي يالمكسور
بدموعك نثايا وطين
حگك بالصور من تطلع مرصّع...
ترى الحرّية شمس الله..
حرام تبوگها الفشلة
الشمس كون لوجه بي ماي تتگبّع...
يهالتعبان يمسافر
خدر كلشي وطفت روحك
صدگ ماصح گبر من تتعب يضمّك!؟
غريبة اسوالفك بالراس
يبنادم
صدگ مامش حضن بي سالفة ِمن أمّك ...
تموت انت
ويموت الشوگ
وِ يطيح الصدگ
والعايزة اتلوحه..
يالكبار! الدمع نيشان
لليغرف حزن روحه....
سحگنه الموت
واحنا ازغار
لا عيد العثر بينه
وّ لا شبگتنه مرجوحة....
يالكبار! المشاحيف الكلتها الگاع
لا سيّرت يم چالي
ولا ضحكت بعد بعروگها ملوحة....
وتخوصر بيدر الحنطة
ونشف دمنا
وتنانير السلف شيّاب….
بالكبار! الگمر غرّب
ولا ريحة خبز بالباب...
واحنا عيون
تتغطى بدمع وتنام
أبو الايد الگصيرة ِيسد فشلته انگاب...
غاد من العطش وابعد
شلب كاسر
وچم صايود مايتفرزن ِمن الطين...
غاد من الگصب وابعد
وطن محني
وچتف سفّان
يتنطّر هوى السبعين.....
ويحشّم غرانيگ الخذاها الخوف:
بس ردّن يالمغربات....
بس ردّن - ولو بالغيم
بلكي بصوتچن يگعد عمرنا الفات..
بس ردّن ...
وخَفگ جنحاهن يسكت
ويتفرزن خفگ روحه :
يالكبار!
الحزن غيّم بالولايات ...
ماظل شي ويطيح الجوع…
حتى بيوت المعزبين موش اولام
باچر مدري وين نبات!..
فهمونه يالكبار!
المطر عدمن؟
الدفاتر و الخبز عدمن؟
باچر كلكم تصلّون
باچر كلكم تشورون
باچر ...
چا يتامى الوطن باچر
تلبد بسد من! ؟
مـيثآق آلهہلآلي
رد مع اقتباس
