مرّت بحياتي لغاية هاليوم تلث حالات مرتبطة بالحظ ، اول وحده ، جنت كاعد اتفرّج مباراة كرة القدم بالملعب الشعبي اللي جان كبال بيتنه ، اجه فد رجّال و انطاني فلوس و كلّي: عمو روح اشتريلي بطاقة يانصيب و تعال و انطيك درهم( جان الدرهم بوكتها كلش جبير ) بلكد اربح من ايدك. اشتريتله البطاقة، بعد اسبوع اجه وهو كاشخ و وصل يمي و طلّع دينار و انطاني و كال: شكراً عمو، كلك خير و بركة البطاقة اللي اشتريتها ربحت الجائزة الاولى!
ثاني وحده، جان اكو بيت بنفس دربونتنه شبه خرابه وجان يسكن بيه شاب يتيم يشتغل حدّاد، جان يخلّي كل فلوس شغله عاليانصيب و بعمره ما ربح شي ، فد يوم كتله خلّيني آني اشتريلك بطاقة على حظّي ، اشتريتله بطاقة و فعلاً ربحت الجائزة الاولى ، مجرّد ربح عاف البيت و بعد ما شفته ، حتى شكراَ ما كلّي .
ثالث مرة ، جنت كاعد بغرفتي بالطابق الثاني و دا أقره ، سمعت صوت والدي ديصيحني و يريدني انزل جوّه، نزلت و لكيت ابوية مطبب بائع بطاقات اليانصيب للبيت و صايح لكل اخوتي و امي وكال : كل واحد بيكم يختارله بطاقه و يكتب رقمها يمّه حتى نعرف كل بطاقة مالت من ، اختارينه البطايق و آني همينه اختاريتلي بطاقة و سجّلت رقمها يمّي، و انطينه البطايق كلها لابويه، صعدت اكمّل دراستي. ابو البطايق اخذ فلوسه وراح ، اخذ ابويه البطايق و بده يشوف ارقامها فلاحظ انه رقم بطاقتي يتشابه ويّه رقم بطاقة امي فصاح على اخويه الزغيّر و انطاله بطاقتي و كلّه روح الحك ابو البطايق و بدّلها بغير بطاقه ، راح بدل بطاقتي و اخذ غير بطاقة ، وآني ما ادري بالصار، ثاني يوم جنت طالع بره، طلعت الارقام الفائزة ، شفت رقمي فاز بالجائزة الاولى و ركضت للبيت و آني فرحان و اصيح، ربحنا الجائزة الاولى.. ربحنا الجائزة الاولى.. شفت الكل مدلغمين، شكو؟ كالوا ابوك بدّل بطاقتك بغير بطاقة.
ومن يومها بطلّت العب اي شي أله علاقة بالحظ.
رد مع اقتباس
المشاركة الأصلية كتبت بواسطة VIP Engineer
