هنا

[الشاعر اسماعيل القريشي]

قصيدة رد الملحدين
كالو ماكو رب والكون صدفة وصار
كل مخلوق بيه نشئات ذاتية
شنو هذا العقل رغم العلوم البيه
مافكر عدل وتحقق شوية
شوف الاوكسجين امعيش الاحياء
شنو خله النسب بالجو كما هيه
كل لحياء تتنفس عليه وتعيش
وتلفض غاز قاتل سم تواليه
شو ما يخلص ويا هو اليرده ردود
ويرجِّع نسبْته بالكماليه
ربك بالنبات امخلي مصنع دوم
يرجع النه صافي مية بالمية
كلي بروح جدك هذا صدفه وصار
شغل هل عقل وتفكر شويه
شوف الزرع تزرع مختلف الانواع
بقطعه من الارض وسكيهه بمَّيَّه
ما يختلط يطلع كلمن باوصاف
بانواع البذور الميته مو حيه
حامض مالح اومر او حلو وي حار
احمر واخضر ابألوان مزهية
وانواع الفواكه وي خضر واعشاب
كلهه ازواج والتلقيحة ذاتية
كلي بروح جدك هذا صدفه وصار
شغل هل عقل واتفكر شويه
الماي انخلق من عنده كل مخلوق
وهوه اصل الحيا يحترك تاليه
ايجيبه النه الثلج والمطر من لجبال
من بعد التبخر دورة يوميه
شنو هاي الرياح اتشيل كل هل غيم
واطنان المياه امحمله يوميه
وينزل غيث رحمة لكل عباد الله
والكيعان كلهه ابمطر مسكيه
كلي بروح جدك هذا صدفه وصار
شغل هل عقل وتفكر شوية
قانون الجذب بالارض منو خلاه
ايقابل قوة الطرد العموديه
(كل جسم يدور حول نفسه تتولد حوله قوة طرد مركزي
ترمي كل الاجسام والمواد المتعلقة عليه بصورة عموديه)
سرعتهه عجيبة الارض من اتدور
ما واحد يحس بالسرعه الارضية
سرعتهه الف بالساعة من لميال
هاي الاولى والعجبة بالشمسية
بالستين الف بالساعة من لميال
تفتر عل شمس دورة نظامية
ميلان الارض عل محور الشمسي
(الارض مائلة على محور دورانها حول الشمس بزاوية 23 درجة
ولولا هذا الميل لكانت الفصول فصلا واحدا على طول العام)
ايحدد فصول السنه الوقتية
كلي بروح جدك هذا صدفه وصار
شغل هل عقل واتفكر شويه
شنو خله الشمس مشتعله ليل انهار
مايخلص حطبهه او وين تاليه
وي كل النجوم التشتعل بالنار
شعلة غاز متنظمه ودوريه
مليارات لطنان الوزن وتزيد
معلكه بالسما باحمال مخفيه
كلتهه بمواقع باعظم الاوصاف
تجري بالفضا ابأفلاك محميه
عجبة شلون ما تتصادم بهل كون
تجري بكل نظام ودقة سحرية
كلي بروح جدك هذا صدفة وصار
شغل هل عقل وتفكر شوية
الكمر منازل من بدر لهلال
ايعلمنه لحساب السنه الهجريه
من عنده يجي مد وجزر لبحور
اروع فائدة للكرة الارضية
وينور الليالي بمنضره الجذاب
وما يحله لمسامر الا كمريه
كلي بروح جدك هذا صدفه وصار
شغل هل عقل وتفكر شويه
ماي النهرمايختلط وي لبحور
يفصلهم البرزخ قسمة مائية
اسماك البحر ماتحيه بالانهار
واسماك النهر بالبحر ما تحيه
ومنهن تغذية بأحلا والذ لصناف
وعجبه شلون تتنفس بالمَّيَّه
كلي بروح جدك هذا صدفه وصار
شغل هل عقل واتفكر شوية
باوع للجسم واجهزته والاطراف
كلبه والغدد وبنظرة عقلية
سمع وابصارولسان وشفايف زوج
واسنان وشعر واطراف حسية
اعظام ولحم والدم عجيبه يدور
من ضخ الكلب دوره شمولية
شنو هذاالكلب يشتغل ليل نهار
مايوكف ابد للموت تالية
خلي نكول صدفه هل كلب مصنوع
قوة هل مضخة بيا فعل هية
كلي بروح جدك هذا صدفة وصار
شغل هل عقل وتفكر شوية
كل هذا التنوع حير الالباب
وعجزو كالو القدرة سماوية
واسأل عن علوم الدنيا كلهه وشوف
الاف الكتب بعلوم كونية
ربي بحق نبيك احمد المختار
واهل البيت والرحمه الالهية
ثبت كلوبنه بالطاعة والايمان
وانعم بالهداية علينه يوميه
اسماعيل القريشي
14 _ 1_2016

[فقار الكرخي]

تسلم ايدك شاعرنا الجميل
احسنت

[الشاعر اسماعيل القريشي]

تسلم ايدك شاعرنا الجميل
احسنت

انت السالم حبيبي استاذ فقار الكرخي ذوقك اجمل وارقى