قصيدة الطائفية
الطائفية
نركض عل سراب وندري ما بي زود
عمينه وما نشوف البيهن الخيرات
وغرگنه ابّحور الطائفية وليش
گضّينه العمر بالونه واللوعات
فتنه وشِعْلت النار بوسط لخوان
ماحصلنه غير الحرب والاموات
كل مذهب اتمسك باللي مؤمن بيه
من ابائه وجدودة وزمان الفات
ما اجبرلي واحد گوّه صير وياي
صعبة وشوف نفسك تگدر اعلى الذات
خل احترم رأيك وانته هم وياي
قابل لحترام وخلنه بالزينات
ونشيل الحواجز من صنع ابليس
هوّه وكل منافق سبب الازمات
وسفه الجهل يتغلب علينه وحيف
طحنه بتفرقة وانتصرت الشمات
انته يلخطيب التحچي بسم الدين
عوف المايصح ويسبب الشحنات
واحچيلي على الايمان والاحسان
واخلاق النبوه ومن هل حچايات
فهمني على المنكر شلون انهيه
والمعروف خلي انعرفه بالاثبات
والقران دستور وسند واحكام
علمنه عليه خل نفهم الايات
واحدنه يفر بآذانه لو سألوه
بس الماضي صار النه سند واثبات
خلي الماضي لاهله وركز اعلى اليوم
نظبط كل فرض نصبر على الكلفات
بس هذا الحچي مو لازم انه احچيه
مختص بالمراجع عدهم القدرات
كل مرجع ايصدر فتوة بالموضوع
كل انسان خي مارس الحريات
بالتقليد كل هذا حقوق انسان
واحنه اسلام خل نبعد عن الشبهات
خنشوف الوطن ينزف وبالانعاش
واحنه مفرقين وزادت الشدات
شنتاني يجي المحتل يعدل الحال
واحنه اهل البلد مو كافي بس صفنات
صدگوني كفر هذا الوطن ينظام
كل عمره الشعب گضّاها بالويلات
اسماعيل القريشي
٢٩/٩/٢٠١٨
رد مع اقتباس
