لا تِعْشَگ
لا تِعْشَگ
لَوْلاها الشمس، ما كِسَر عودي فْياي!
المطر لو ما الگاع، تْضيع سالفته!
أنامْ وْ بالي يَمْهُم، خاف غَثْهم طيف!
العاشگ عينه دوم لْلِبِسْ صاحِبْتَه
أطيّح عيني لَلّي يْريد منها يْطيح!
الغيمه الْ منها طايح، تظل ناطرته!
يَهَلْبَت مِنْ يحرّْ يصعد، وْ هم يْطيح!
حلاة(ت) الْ عايْفك، يِلْگاك ما عِفْتَه!
الضوا يرجع لْحضنك مِنْ يِطِگ بالجام
العود الْ مو جُوي، يِتْعِب الْ شاتلته
الذيب يْوَلِّم لْمطلاعه گبل الصيد
وْ ما يمشي بْطريج ذْياب ساحگته!
النگاب يْضم ملامح ما يْضم عْيوب!
الحِجِل، فاضح جْدام المره الْ لابِسْتَه!
رافگ دونك، تْميّز الْ يِغْرِف بيك!
الماي الْ يا اشْلَذْته، النِگَر شايلته!
الحايف و الشمع ما غُفَوْا ليله طْباگ!
السيف الْ يِرتخي، يِكتل الْ حاضنته!
وْ خَلْ سِرَّك بْصحرا، البير ناسه هْواي!
المضايف للغريب، الصدر حاجزته
وْ عَوّدْ روحك بْلا ربع، كلشي يْصير!
الطيف يْكتلك، الْ راعيّه فارگته
مْفارگ گبلك وْ ملچوم من چم طيف
وْ هم مبيوگ خل، وْ عايش السكته
لا تِعْشَگ! أخاف الْ عاشگه معشوگ!
بْروحك خَلْهَا، ولفك غُرُبْ ماخذته
استنگي لْيسرتك مو ثوبها الفنیان
الْ رَهَم چَفّك، فَرِقْ عَ الْ گوّه رَهَّمْتَه
و اخذ دور الطريده، انْصاد، عوف الصيد
و انحب، كافي تْحِبْ تِظَل بس انتَ
و اعْثَر، مو فِشَل و اعرف الْ رافگته
ارجع بالنهر، تلگاه مْطشّر چان!
الْ يلتم بجفن، خَلْ يِشِد راحلته
يَماي تْحاذر الغربيل لو شفته!
اتّعض؛ شوف الدمع/المطر ما يدري يمتىٰ يْطيح
السهم شرايته ما يدري بايعته
السهم شرايته للغُرُب بايعته
الْ يِرِد مثل الصبح بِهْداي يِكْبَر بيك
الضوا يعمي العيون الْ گَبُل شايفته
محمد الجراح
رد مع اقتباس
