عله الشبگه السوالف توجع المشتاگ
عله الشبگه السوالف توجع المشتاگ.....
یتبده الحنین و یلتم ابذکره
الیشیب شعره من ایلاگی الحدیثات ....
یمشی و باله کله ایصیر یم شعره
و من ایلاگی شایب .صاحبه و ناسی....
من یصفن تحسه ایدور ابعمره
تره الحطاب من یشتم خبز محروگ...
تحس انفاسه بیهه اقصان متکسره
المایعرف قرائه اجروحه کلهه احروف....
مو بس الحجاره .اللافته اتعثره
السان ابحلگ الاخرس جسر بس مگطوع
الحچی ابنصه و یرد مایگدر ایعبره
و بل ثوب الفتگ .هم زعل بین اثنین..
تسولف خیط و اتراضیهم الابره
هذن کلهن ضگتهن وانته عنی ابعید
و احب غیرک ردت بس تعرض العشره
لو ساگی الشمس بدموعی خضره اتصیر
کل هاذه و سنابل جیتک صفره
اظم سرک فرح دفان اجا تابوت
محد یدری بیهه الزفه البصدره
و اعرف طینتک بس تضم سری اتموت
الکتاب ایعیش من ایسولف ابسره
مای اسرای و احبابک سلف محروگ
حتی اعله الصریفه الطافیه اتشمره
بعدک حیرتی اخرس یطیح اب بیر..
و لگه امن اطیحه کل اعضامه متکسره...
و یجی و یلگا بخیل ایرید یترس مای
شبر یطی الحبل .بس سولته ایگصره
اسهام ایدک نعام و لگن ظهری اتراب....
ضمن روسهن و اذیولهن بره
و آنه اول بشر مصیوب خله اطیور...
بنن عش عل سهام النابته ابظهره
و گالو بهذلک .گتلهم اشتدرون
یرتاح الشذر من یگعد ابحفره
و اسمر گالو و گلت اکره الشگران
الورگه اطیح لمن تنگلب شگره
حسین السید نور
رد مع اقتباس
المشاركة الأصلية كتبت بواسطة سمراء من قوم عيسى
