شعر شعبي غزل ، فارض هيبتك من تمشي عالكَاع
وجهك يختلف عن كل الوجوه
وقوه جاذبيتك مالها حدود
موخدين عندك بيها تنباس
حتى ع الشفايف عندك خدود
اليشهدون ماشهدو لك بزور
كلهم يم جمالك صارو شهود
آثر خطوات جدمك لو تمشيت
آحس عبد الحليم يغني موعود
فارض هيبتك من تمشي عالكَاع
بالاستعداد توكَف رتب وجنود
طولك عاصفه وقوه دفع ريح
تضعف بالسكوت وبالحكي تزود
حواجب عينك آمتدت محطات
وبعيونك غركَنا بآول الزود
كل خصله بشعر راسك حضارات
لأن لون السنابل من زمن هود
خصرك عود بس صدرك هرم كان
وتخيل هرم والشايله العود
الحسره لغم ونفجرت بروح
عليك شكم كَلب مليان بارود
آكثر من شمس وجهك على الكَاع
منك سومريه وكَالو هـنـود
ملكات الجمال بكل العصور
بالنسبه لجمالك طلعن أقرود
البشر يكبر يشيخ بمر الأيام
بس أنت الزمن يرجعلك أردود
طعم خوخ الشمال بشفتك صار
وألك آقليم وحدك سوه مسعود
عنب آنت وعليك جفوفنا كَصار
ولو عنكَود واحد ياترف جود
أظل انتظرك حد مايجي الليل
فوكَ من النجم كاتبلك اوعود
ولو مامنتبهلي وماني عالبال
ولاني بآبجديتك حرف منشود
لكن والغوه البرموش العيون
وحق وادي المنايه البين النهود
آكتبلك شعـر ماكتبته آقـلام
ولايمكن قريته بـزمــن داوود
وشطب كل شعر ماينكتب بيك
وخنكَها الأوتار بركَبه العود
م
رد مع اقتباس
المشاركة الأصلية كتبت بواسطة هيفين
