يا ابن أمي انقطع قلبي.
للشاعر المرحوم كاظم منظور الكربلائي.
يا ابن أمي انكطع كلبي .. وعيني ظلّت ربية.
وين العَلَم وين الجود .. وين جفوف راعيَه.
زينب على التل تصيح .. لحد يا حماة الجار.
علينا حركو خيمنا .. وبينا ما دريتو شصار.
وين اللي تطفّي النار .. بالنار وتشب النار.
وين الما تلمها دروع.
وين الما تهاب جموع.
وين الما تعَرف الروع.
وين مدرَّبة حيدر .. وين التحيي ماضيَه.
يا أهل الخيل اجتنة الخيل .. وين اللي ترد الخيل.
وين اللي تشد الحيل .. بالحيل وتهدم الحيل.
هيجو من الثرا هيجو .. حرايركم ولاها الليل.
لا تخلوهن بهالحال.
يالمتوسّدين رمال.
نزل عدكم وبيه عيال.
نزل الما اله حمّاي .. تتهدّم مبانيَه.
شاطت للمعارة تريد .. تدوِّر جسم أخوها حسين.
نوبة تعَثَر نوبة تكوم .. ما تندل دربها منين.
مَتكُلّي شتشوف العين .. لو فُكدت صبيها العين.
ظلّت بالمعارة تحوم.
عالغبرة تشوف جسوم.
رمية مغسّلة بدموم.
والريح بعجاج الخيل .. جفّنهم بذاريَه.
مِن شافت وريد حسين .. مكطوع ويسيح دمّه.
انغشى عليها وهوَت فوكه .. ومِن مجرى الدما تشمّه.
تِكِلّه سهم البكلبك .. شعل كلب اختك بسمّه.
يا هالنايم على الغبرة.
دم طبرة بأثر طبرة.
جسمك منسحك صدره.
وظهرك يا بعد عيني .. ليش ضلوعه محنية.
يا ابن أمي خلِصت روحي .. شلي بروحي عُكُب روحك.
دم تتفايض جروحي .. مجراهن من جروحك.
نشف ريع الكلُب موحه .. يا خوية من نشف موحك.
خلّيني أرد أموت وياك.
ما أكدر على فركاك.
يا ابن أمي وعُكُب عيناك.
يرميني بسهم جتّال .. لو شامت يصد لية.
صدّت للشريعة تصيح .. عسى لا جان ردت الماي.
حياتي انعدمت وشِنهي .. حياتي مِن عُكُب وِلياي.
رِدِت بالماي أبرد حشاي .. جمُر خلّى بضميري حشاي.
عُذُر لله يا راعي الباس.
شأكولن شأعتِذِر للناس.
على الماي فكَدِت عبّاس.
ريت العلكمي لا جان .. نهره ولا جرى ميَّه.
يا خوية وضربة العامود .. حالت بينك وبيني.
وسهم اللي فُكَس عينك .. مثل عينك فُكَس عيني.
كِطع يسراك ويمينك .. وكِطع يسراي ويميني.
ما عالينجِتِل معتوب.
كِطعنا للسعادة دروب.
رضينا بالِّذي مكتوب.
أنت على النهر مطروح .. وأنا للشام مسبية.
رد مع اقتباس
المشاركة الأصلية كتبت بواسطة Haidar Iraq
