اسبعطعش (اشتهيتك) كامل العامري
اسبعطعش توني اعله ماي الثوب ضكتك
واشتهيتك مثل عنكود العنب..،
سجين كطعني واحبك
عشب ليل وكنطره اعيوني اعله مايك.،
وكلبي سعفه وصلت ابوجهك ركعتين الصبح
مطر غيمة ريش جدمك..،
والمشي بكاعك فخاتي
ياحلات المشتهه اليلهث على نهودك غزال
من تكف حد النبض ..
مبخوت اصحيلك يهل مبعد تعال
جيسني وردني بصابيعك سفينه
اشتعل طير اعله خصرك..،
وانطفي ابعينك مدينه
ازحف بروحي ورد وانه سواجي
واصلب بدمي الوكت عمرين ..،
اثيلك بواجي
وانطرح بيدك كمر..واتكبع بليلك حرير
وانحنيلك جلدي غابه..
وصوتك امسنبل حدر روحي حمام
اطبكـ جفوفك طفل ..
وجهي شجر مصلوب وعيونك حياة
وروحي وجهين الرمل والنار واشفافك فرات
ياقميص الشوك يلملتف على عيوني خضار
صدرك بصدري زراك السمه بغبشه
من يدكـ وشمه على اشفاف النهار
هاك جلماتي عصافير ونبض كلبي غزال
اتعده بيهن شجرة الدم
التفيهه سنينك
روحي تتمرى الليالي
تشوف يسراك الكمر..،
والشمس تفاحه بيمينك
ياسمه المحني صدر ام اعله وجهي
الخبز جوعان وحليبك
فرس دم بروحي تمشي
ياحلاتك ينغسل وجه التعب من يعتنيك
ياحلاتك وجهك اطيب من خبز حنطه بصريفه
نار اسهرك فوك جلدي
وينفتح شوكي على جفونك بحر
اعبر بلا صوت روحي
المرمر ازرع وردتين بماي صوتي
اطبع بظهري صليبك ..كطره كطره اسكيني موتي
اذبحني مرتين بسمار البيك
انبع نفس من يصعد وينزل يشتهيك..
ياحلاتك ينغسل وجه التعب من يعتنيك
لفني خيمه وسافر بكل السجج..
تلكيني مابين الجلد والثوب اخضرلك براعم
بيدك احضني ..عشك موتك
لعب طفله بجنح فراشه ناعم..
رد مع اقتباس
