حجايات فارس للشاعر كامل العامري
امشي خطوه..
ارجع بعينك خطوتين
اضوي نجمه..
تطفي بيدك نجمتين
وياهو يوكف حد سمه وحد كاع..
ويردني ابنبض حبر الدفاتر جلمتين
الشوكـ صوت..
السكته صوت..
الموت صوت..
لو صفن وجه الفرات ..،ايبيع موته ..
ويشتري للمشاي صوت
وموكلافه ابسعفك المحني اعله كلبي
تسافر بحيطان خرسه
وتعتني لدنياي صوت
انت موتي ..وياحلاتك..،
من تجيني ويه السفر خطوات موت
خاوي عمري..عمري من عمري خجل
وشوفي من شوفي خجل
تدري حسبات المشه بروحه الخجل ..ـ
موت وحياة
كلبه يعثر بالنبض والمستحه
وعينه تعثر بالدمع والمستحه
شلون تغمض عين خاواها دمعهه
وكل رمش بيها شجر للمستحه
جفوفي سطرين ومسافه..،
اشما تصب نهران صبرك..،
تبقه حدين المسافه البينك وبيني جبيره
الماي تاريخ وعشكـ طينه بضميره
وسافر ابعرج النخل ملحه بضميره
وغنه شمسه وكمرة الليل بضميره
الماي ..ماي..
لكن انته ولاصفه من الماي شايل
انته جنحين بكلب عصفور ماتن
الكاع موتك..
والسمه اعله المشتهه تسافر خيال..،
وياخيال اليصدكـ ..،ابجدم التوشل كطره كطره من الصدك
انشد انشد..
من تجيك اعيونك ابجذبك تجاوب.،،
تخطف اعيوني وجوابك..ينطفي ابعينك سؤال..؟
الروح مديوره اعله كلبك..
تذبح الجلمه بصلاتك..
قبلتك وياك تحجي ..تذبح الشوكـ بلهاتك
شوكي يتسنبل خناجر..للتراب العاشر جدامك ..
سفر عمرين يحجي
ولو حجيت وكلبك الجذاب يحجي
بيع وجهك ... بيع دمك
بيع كل لحظه برفيفك... واشري لعيونك رمدهه
عيش ميت هاي سوله.. كلمن بشوكه يبيع ويشتري
(كان قلبي مثل وجه الماء في وجه الضياء ..كان يلغي كلما يحمله الزيف ويمضي باتجاه واحد..يسرج النبض حصانا ويسافر...)
ريت يومك ينصلب ويموت امس بعيون باجر
ردني ردني..
وجهي يرفض لون وجهي
وعيني ترفض ماي عيني
وعمري يرفض باجي عمري
ردني ردني..
لون مثلك شوكي بيع ومشتره
جا غمض ليلي ابنهارك وانطفيت
جاولك هلبت ..
عبر وجهي اعله وجهك واستحيت
ردني ردني ..
العركـ يخجل من يمر مايه بصابيع الجذب
العين تخجل من تبردهه البواجي بدمع ماصخ
الكلب يخجل لوعثر بالخوف نبضه
وانت وانت موشل من الخجل عينك
اموشل من المستحه
بعد ياجلمه التجيبك..
لويصير الليل هم..
لوتصير الجلمه دم..
ردني ردني..
الكبل يومك وامشي ظلمه
الماي وجهه وطينه واحد
الماي دربه وشوكه واحد
ماتهم الماي ظلمه
نبضه يتمشه اعله وجهه
وكل نبض بالماي نجمه
ردني ردني..
الخجل يخجل..والنخل كلفه الحشايش بيه تلوي
كل مسافات الكواكب تنمحي..وانه اظلن واج بالدنيه ورمادي
اشما تطشه الريح يضوي
ردني ردني..
الصفر يبدي الجدم منه
لكن انت اجدامك بعمرين ماتوصل صفر
اشمبعدك عن المسافر..
شوكـ موته امن الزغر
عطش ياماي القصايد..
اكفر ..اكفر بالشعر..
ارفض الكالو نعم..
وارفض الكتبو نعم..
وارفض الشفه التجيك مزوكه بجلمه نعم
الكاع ظيم..
الخطوه ظيم..
بيا جدم نمشي لبختنه بياجدم
بيا قصيده انفك حزنه بيا قصيده
جلمة المذبوح سفره..
وسجة السفره بوريده
الشوكـ غورب ..
ياعشكـ انفض رمادك واشتعل دنيه جديده
رد مع اقتباس
