هنا

[hamza al-yassiri]

الانسان موقف وليس لقلقة لسان
************************:
ملاحظة : الانسان موقف وليس لقلقة لسان - سفر واقعي راق لي فنشرته



اهل السماوه يعرفون جواد گحن وشلون الله ختم حياته بخاتمه يمكن حتى مرجع الدين والمتفقه بلاحكام الشرعية ما يحصل مثل شرف تلك الخاتمه لا ماندر مع العلم الشهيد جواد ما كان صاحب وعي ديني بل كان انسان كادح ولهو الشباب يطغى على تصرفاته وسلوكه ومع ذلك كان قريب على قلوب المجتمع السماوي،،،،
جواد اعتقل من قبل ما يسمى قوات القدس الحرس الجمهوري الصدامي اثناء قمع انتفاضة شعبان آبان دخولهه لمدينة السماوه اواخر شهر اذار لعام ١٩٩١ وبعد مصادمات مسلحة تم القاء القبض عليه
ولما اخذو لمعتقل الرضوانية في بغداد مع اعداد غفيره من جمهور محافظات الوسط والجنوب المنتفضه،،،
يسولف صديق من اهل الشامية الله كتبله الحياة وطلع بأعجوبه من سجن الرضوانية وكان شاهد على الحادثه.
يگول والحديث لابن الشامية: لما دخل المقبور (صدام كامل) حماية صدام الملعون بذاك الوكت.
يگول وگف بنص المعتقلين شاهر مسدسه واحنه بحدود اربعتالاف معتقل وصار يغلط على اخواتنا وامهاتنا ويسب الشيعه
ويگول تردون الحكم يصير الكم ومن هالكلام الطائفي واحنه لاحول ولاقوة النه
وبهالاثناء صاح اليحب الحسين ع يصير على صفحة اليمين والما يحب الحسين ع يصير على صفحة اليسار والمسدس بيده وقبل هذا الكلام رمى اربع طلقات وقتل اربعه من المعتقلين،،
يگول كل احنه صرنا بصفحة اليسار
بأعتبار ما نحب الحسين حتى نخلص ارواحنه
وبقى بس جواد الگحن على صفحة اليمين وسط ذهول الجميع وتعجب قوات النظام الصدامي،،،
التفت صدام كامل لجواد
گاله يعني انته تحب الحسين مو!!!
(عجل يابه) اليوم اسويك عبره واخلي المايشتري يتفرج،،،،
رد جواد بصوت عالي وصاح شتسوي سوي وشغلة اعوف الحسين وانكر محبته هاي سالفه؟؟؟
صاح صدام كامل جيبولي تاير مال لوري
وربطو جواد وخلو وسط التاير ودارو بانزين على التاير وجواد مربوط بنص التاير والنار تلوح بي شويه شويه لما التهب التاير وبعد ما نشوف جواد لان النار علت والدخان اخذ مساحه المكان بس نسمع جواد يصيح يا ابا عبد الله ياحسين ياحسين لما صار الصوت يضعف ويضعف ويضعف وتالي سكت الصوت وعرفنا جواد مات واخر كلماته يصيح ياحسين ياحسين
ولما تيقن المقبور صدام كامل ان جواد مات سأل المعتقلين وگال هذا جواد من اي ولاية؟؟؟
گالو من اهل السماوه
تالي دار وجهه وطلع
كل المعتقلين تندمو على موقفهم المخزي وبقوا يلومون بأرواحهم ليش ما سوينه مثل جواد مع العلم احنه اول وتالي معدومين،،،
..................
رباط السالفة:
اعمل المعروف ولا تستصغره فلا تدري اي حسنة صغيره تدخلك الجنة ، تيقن ان صاحب المبدأ الثابته لايمكن تغييرها بالقوة او المال او الضغط وافهم واعلم ان العقيدة هي ما عقد عليه القلب والذهن وهي التقوى .
يقول تعالى ( انما الله يتقبل من المتقين)
الرحمة والغفران على ارواح الماضين بدرب الشهادة واصحاب المواقف الخالده.
منقول : موفق الياسري

[Haidar Iraq]

الله يرحمه ..
شكراً لك ..

[أغرد بهمس]

رزقنا الله عشق الحسين