اليل من يبرد يلم وين الحنين
بارده عيون المدن
والدرب بارد
وتايهين انه ويكلبي
واحد يدور اعله واحد
هوه هذا
اليل من يبرد يلم وين الحنين
والغريب
عيونه تتبده اعله كلبه
وتاخذه متاع المناجل
وين ما خضر هلي
ااااخ مني
شكد بجيت
ولا عرفت عيوني عدمن
ولا دفو رويحة حلال اليلتفتلي
كل دفو يكره بنادم
من تصير النار عاجر
أي يكلبي الناس غشمه
الماله بشباج كذله
يطيح من عين الرسايل
تعبتني
الشوف لو جاسه التعب شده بقميص
ولا تزعلك نهر تشبع فطور
ليش
باهلت الضفيره
وعطشت هيبت سمارك
وأنه عازلك شريعه
بوكت جان الماي جف وعين سعره
جنت الوليلك بحزني
وكتلك الكاروك لثكله عزيز
وانته أعز
من الرساله
السوفت قصت محمد عد محمد
شوهدناك وسافرت لدنيه طين
شحصلت منه
الترست عيونه هاك
وانته ذاك
اليضحك بواهس عشيره
وماله بكلوب الخلك گرصة مجان
ولأني اندل بلوجوه الماتشبهك
يغار من عدها الكحل
وأنه ريحة ضوء مهزل
عايش أعله الهلبت الله
لا خذتني الفاجده أجمل حزنها
ولا صرت بزر التراب
وباب باب
اتوسل اعيون المكابر
مانفك لعيوني باب
وين ماصيرن نبي
يفضحني غار
وتطلك الدنيه قريش
هاي وآدم
موش وادمنه يكلبي
كل ذنب يعبد بكيفه
بكيفهم ليليه رب
ومدري ليش
خلقو التابوت والجربايه من نفس الخشب
ومدري ليش
السله حطت گورها وگور العنب
وااااخ يا ذاك التعب
بدو سنين الندى بحضن الگصب
رخصو دمعة حمامه
وضمو متون السمه
وأنه ادري العش أمام !
شور بكل شجره ما فكت خصرها
مايشبهونك يكلبي
ولونهم مايشتهينه
الخلك كلها شراع هندس
واحنه فانوس المدينه
ناصر البدري
رد مع اقتباس
