هم مرت عليج بلا عشه تنامين؟
يبت الناس
يااحلا حلم دغدغ جفن غافي
ياحلا قصيده تلاعب اشفافي
يبت الناس
بس حچيي الصدك مريود
وحده العشگ مو كافي
فرق بيناتنه مثل السمه والگاع
دنيتكم فرح چلبي بفرح دنياچ
ولچ عدنه الحزن مامنه الچ مطلاع
ولچ وكتي بحر سودنة طبعه الريح
وانه بطرگ اديه بلايه حتى اشراع
اغرف بالجرف ونكسر مجدافي
يبت الناس
وحده العشك مو كافي
ابوج انتي امير ومغتني بدنياه
وانتي مدلله بفلوس ابوج
شردتي اتحصلين
طبع صيفج زلال ونشوة بروده
وانا صيفي مهفه حدر حايط طين
ولج دنياج كلشي موفر وموجود
ودنيانه هفه من كلشي محرومين
اسولف خافن ازعلين
هم مرت عليج بلا عشه تنامين؟
هم مرت عليج بلا غطه تنامين؟
هم بليلج تحلمين؟ شتحلمين
وذا كل ذني مامرن عليج
شجابج تحبين
عوفيني
ودوسي على الكلب والعشك كله نسي
والف غيري اليتمنوج
كلي الي املكه گلادة امي
وكل سعرها بكعده من كعدات ابوج
يبت الناس
هيجتي الجروح الغافيه من اسنين
ومو كتلج من سابج وكتنه ويانه مو صافي
يبت الناس وحده العشك مو كافي
كبل امي تسولفلي يمه كان ياما كان
ذاك الوكت سلطان
بنته مدلله وحبت ابن فلاح
سمع بيها ابوها
وكال للفلاح باجر تترك البستان
وماتت امي
وضلت سالفت سلطانها ابالي
يمه انه ارد اسولفلج
وبلا كان ياما كان
يمه لكل وكت فلاح
يمه لكل وكت سلطان
يبت الناس انتي بنيت السلطان
وانا الفلاح ذاكك الضل بلا عنوان
م
رد مع اقتباس
