هلاو
مرة نزلت تجربتي للبشرة
كانت قبل سنة يمكن
ما أتذكر لكن غيرت هواي سوالف وعادات
كلش كلش فرقت ع وجهي
الي سويته هو :
تركت كل مواد التجميل الي تلامس الوجه
كلشي كلشي
من كريمات وبرايمر وكونسيلر وخافي عيوب ... ألخ
چنت خايفة من هاي الخطوة هواي
بس اتجرأت بعيد المرأة وقدمت عليها
وچان أفضل قرار أتخذته بحياتي والله !
بشرتي خلال سنة رجعت كأنه بشرة أطفال !
كل الحبوب أختفت وآثارهن !
يعني هسة طلعت صورة قديمة لوجهي
صدگني حسيت بفخر
فأول شيء تسوي تركي المكياج
بعدها شوفي بشرتچ اذا جافة او دهنية
اني بشرتي جافة ومتلائمها الزيوت لذلك أستخدمت نوعين من المرطبات
هن :
طبعاً هذا المنتج أفضل منتج بالعالم كله شنو يا ربي ! جمال مو طبيعي !
يرطب البشرة ترطيب هجي يخليها كلش نضرة !
ومو بس هچي يجفف الحبوب بدون ميسوي تجفيف للبشرة وكل آثار الحب يمحيهن !
الأصلي سعره 20 ألف أو أكثر اكو نوعيات كوبي بس موادهن كيمياوية فالأفضل تجنب المواد الكيمياوية بأي منتج !
الثاني
هذا أخذته قبل 5 أيام بس
سعره 35 ألف
هو مرطب للوجه نهاري وليلي ولأن بشرتي جفافها قاسي فأحتاجيته
من أول تجربة خلاني ابجيبس مرة وحدة والله ووجهي صار لين لمدة يومين ! ما احتاجيت اخلي منه !
وهسة داحسه فدشي
يعزز الكولاجين بالوجه ويغذي البشرة وغني كلش بفيتامين سي
منشأه لاتيفيا وأغلب مكوناته طبيعية وهذا الحلو
طبعاً كنت أستخدم زيت الجوجوبا
هو لطيف ويرطب بس بدأ يطلع حبوب
بشرتي متمتص الزيوت لذلك أفضل المنتجات الخفيفة والمراهم
أكو زيت الأورغان تركي
يكون قوامه مرهمي مو زيتي وسعره 8 الاف بس !
يخبل يخبل
هاي صورته
وكلش أنصح كل بنية يكون عدهة من عنده
وبالنسبة للغسولات مالت الوجه
فسري إنه ما استخدم اي اي غسول
وكل الي استخدمه هو صابونة دورو الخضرة التركية
تنظف وجهي ومو كلش تجففه مثل صابونة الرگي
والتقشير لأن بشرتي جافة أستخدمه هجي :
اجيب سُكر خشن ونصف ليمونة
واخلي مرطب نيفيا او اي مرطب اخبطه وية السكر واخلي السُكر فوگ الليمون وأسوي تقشير خفيف للبشرة بحركات دائرية
إضافة المرطب متخلي وجهي يتهيج او ينخدش
سالفة حلوة
أما البشرة الدهنية فكلش كلش أنصح بصابونة الرگي
هي تشبه سوبر مان الي ينقذ الوجه من الحبوب !
الغسل اليومي للبشرة لأكثر من مرة ينظف الوجه من كل الدهون الي تتجمع ع الوجه ومع الأتربة تكون الحبوب بالوجه !
وأكرر الحجي عن قناع مي الورد والنشأ
حيل يخبل
مي ورد ونشأ حليهن سوة وخليهن ع النار حتى يجمد ويصير قوامه سميك
ومن يبرد سوي قناع ع الحبوب وبشكل يومي يعالج الحبوب
واذا وحدة ما إلهة خلك هالاقنعة تسويهن اكو منتج الطين الهندي
الأصلي سعره 25 ألف
عليه حجمها جبير كلش ويكفي حتى سنة كاملة !
يعالج الحبوب ويخفي آثارهن وشفت نورس ستار تحجي عليها هواي وتستخدمها
بالنسبة لشفايفي فمنقذي هو نيفيا للشفايف
علبة صغيرة ولطيفة هواي وسعرها ألفين يمكن !
فدشيء سحري لأن من اني وصغيرة دائماً شفتي متشققة وكلها دم
فهاي صدوك صدوك نقذتني
وبعد إزالة شعر الوجه
دائماً أغسل وجهي بماء بارد وسُكر
حتى متتهيج البشرة وتطلع حبوب
وهاي هي
بشرتي قبل سنة بالضبط
وهذه الصور
قبل دقائق ألتقطتهن
بالكامير الأمامية للجهاز وبدون أي فلتر
والي بخدودي شامات وليست بآثار حبوب
رد مع اقتباس
