...
كواكم الله اعله التعب
وترابكم يسوه الذهب
مشايه جيتوا لكربله
صاحت مواكبنه هلا
كواكم الله على التعب
............

ياهلا وميه هلا باعلامكم
ياملوك واحنه من خدامكم
هالمواكب كله من تخدم تكول
ردنه نتبرك نبوس اجدامكم
ننتظركم كل سنه ..والدرب بيكم حله
خادم الموكب يصيح .....هلا بزاير كربله

ياشلتوا رايات المشي
الكم نرخص اغله شي
هذا تعبكم بيه اجر
كل خطوه تنعد بعمر
...
كواكم الله اعله التعب
وترابكم يسوه الذهب
مشايه جيتوا لكربله
صاحت مواكبنه هلا
كواكم الله على التعب
....

هذا ابوي ابشيبته اتلكاكم
اعكاله بيده وصوته ياحياكم
يصيح يازوار لو زرتو حبيب
خلي يسجلنه خدم وياكم
شال بجفوفه علم ..هوس اباب الخيم
حلفوه ابفاطمه .....يخلي اسمنه وي الخدم
واكف ابوي اعله الدرب
الكم فتح باب الكلب
ويصيح حي الله اليجي
غير الاجر ما نرتجي
...
كواكم الله اعله التعب
وترابكم يسوه الذهب
مشايه جيتوا لكربله
صاحت مواكبنه هلا
كواكم الله على التعب
....
صوت بيه نبره محنه ينادي
هاي امي تصيح عفيه اولادي
يمه هنياله الخدم بالاربعين
وصاح زينب ردت ابلا حادي

امي هاي محزمه ...للمواكب خادمه
تصيح بيكم يالولد..... افتخر يم فاطمة
اعليكم ييمه ابشيلتي
خلوني ارفع هامتي
وتكلي زينب بالالم
كل الهله بأم الخدم
....
كواكم الله اعله التعب
وترابكم يسوه الذهب
مشايه جيتوا لكربله
صاحت مواكبنه هلا
كواكم الله على التعب
....
ابالي صورة وهيجت الامي
من عطش زاير شفت جدامي
طفل ينطيه ماي بجفوفه ويصيح
انه خادم لرضيع الضامي
ابني من وكت المهد..كتله اخدم للأبد.
من الطفوله ياحسين ..وقف الكم هالولد
مادامه يمكم ما يضيع
اخذوه عبد يم الرضيع
يامحله صوتي اليعتلي
يبرالكم الله وعلي
...
كواكم الله اعله التعب
وترابكم يسوه الذهب
مشايه جيتوا لكربله
صاحت مواكبنه هلا
كواكم الله على التعب
....
هالمواكب يختلف قانونها
الخير كل الخير من ماعونها
زاد ابو السجاد محد من عليك
نعمه هنياله اليعرف يصونها
الف هنياله الوكف ..بموكبه وصوته هتف
ربي شكراً عالحسين ..خدمه الزاير شرف
يتمنه جبريل الأمين
ينصبله موكب للحسين
نسمع نداءه من السمه
هنياله خادم فاطمه
...
كواكم الله اعله التعب
وترابكم يسوه الذهب
مشايه جيتوا لكربله
صاحت مواكبنه هلا
كواكم الله على التعب
....

الشاعر مصطفى العيساوي