قصائد حسينية مكتوبة
كلمات قصيدة هلا بزوار الحسين - مكتوبة كتابة - قحطان البديري
تظل عيني ابدربكم * يزوار انتظركم * خدمتي وخيري انتم
هله بزوار الحسين * هله بزوار الحسين
لملمت ربعي وغراضي وللمواكب جينه
وعله الموعد يالغياره ننتظر ظلينه
كون نبقه ابوجه ابيض ليكم اتعنينه
سنة نجمع قوت اهلنه وانحس ما وفينه
وإذا ويه اهلي اقصر * المهم يم موكبي اتمر * تعال ابخاطري اجبر
هله بزوار الحسين * هله بزوار الحسين
ياوگـت اسرع اشويه يلا وارحم حالي
سنة وحشه اتمر عليه الموكب ايظل خالي
حضرت كل غالي عندي الغالي بس للغالي
وانه ماعندي اغله منكم يالبختكم عالي
اتاني ابعيني دمعه * اصابع ايدي شمعه * اصيح وصوتي سمعه
هله بزوار الحسين * هله بزوار الحسين
حتى بيبان المواكب ع الوعد وفايه
عرفت وفتحت نفسها لجية المشايه
الرايه وصله اقماش لكن بيها سر واحجايه
بس گرب موعد الخدمه ايرف گلبها الرايه
يحركـها هواكم * يزوار وغلاكم * بقت روحي وراكم
هله بزوار الحسين * هله بزوار الحسين
الماي والچاي المهيل والاكل حطيته
والفراش البي عطركم من وگت مديته
ولدي والجيران واهلي والعرف لميته
مانخيته انه اعله روحي ليكم اتنخيته
سمع بيكم واجاني * وعلى الموعد لگاني * سنة گاعد واتاني
هله بزوار الحسين * هله بزوار الحسين
لا تضيعون المكان البي ثبت عنواني
موكبي نفسه يزاير لاتروح الثاني
هيبة بالخدمة التنافس انه وي صحباني
الله يتباهه ابعددكم من يزود امجاني
مكانه ابعيني يكبر * الزرعته اوياكم اثمر * المهم ارضيكم اكدر
هله بزوار الحسين * هله بزوار الحسين
انچان بيت وچان خيمه لو غرف ابنيها
المهم روحي وسيعه من المكم بيها
المكان ابملگه اهله والهله ابراعيها
واني كل عمري ورضاتي هالخدامه اوفيها
ولا معنى الحياتي * خدمتي البيها ذاتي * صحت حته ابمماتي
هله بزوار الحسين * هله بزوار الحسين
بأربعين حسين خادم للخدم حسبوني
والله لوبيدي يزاير انطي حته اعيوني
كون احطلك كلشي غالي ابسفرتي وماعوني
ما اريدن صيت اريد ابخدمتي ايقبلوني
حسين اقبل خدمتي * ولا تگطع دمعتي * صحت صوت ابعبرتي
هله بزوار الحسين * هله بزوار الحسين
كلمات الشاعر واثق العيساوي
كتابةة Zahraa Al obaidi
لتحميل القصيدة Mp3 >>> اضغط هنا <<<
رد مع اقتباس