كلمات قصيدة أويلاه مكتوبة - باسم الكربلائي - الشاعر احمد الذهبي
اويلاه ..
هذا البدر من يا سمه ؟
اويلاه ..
هذا القيوده ابمعصمه
كاسر اعظامه حبل قيد الأسر
منحني وصاير مخيم عالخدر
اويـلآه اويـلآه
__________________________
ياحلم رايد جواب
جبت صورةْ يامصاب
وراودتني
اني ماشايف اسير
منحني ابهيبة امير
شوفتني
هذا معقول العليل
يسند الناقة التميل
وحيرتني
اگطع الشك باليقين
هذا زين العابدين
وجاوبتني
حرامات .. ذاك التشوفه إبن النبي
حرامات .. ذاك اليهضمونه أبسبي
باچر من الله اليجرحه اشيعتذر ؟
منحني وصاير مخيم عالخدر
__________________________
عاليتامه امخلي عين
وعين يم نحر الحسين
وهيه حيره
عالرمح شالو ضواه
وتنضرب زينب وراه
وهيه أميره
اسياط وحبال وسيوف
وعين ماترحم تشوف
ماكو غيره
والعبد صاير وزير
والملك ظل يستجير
ابلايه ديره
حسيناه .. دار الزمن بأهلك تره
حسيناه .. دار وحُكم خصمك جره
دارت وحسرة بناتك تستمر
منحني وصاير مخيم عالخدر
__________________________
إيد شدوها إعله ايد
رگبه لفوها ابحديد
وممشه هيمه
ينحني بس مايطيح
ريح يتوچه اعله ريح
دمعه غيمه
چنه يسأل ياسماي
للنوارس ماكو ماي
ماكو خيمه
سكنه تسأل ع الدلال
ويجرح إحساسه السؤال
وبـي هضيمه
يعباس .. ماي اليتاماكم ردت
يعباس .. ماي السكينه ماجبت
عطشت ولسه الرجعتك تنتظر
منحني وصاير مخيم عالخدر
__________________________
كل جرح ينزف
عتاب
ويمم إجروحه التراب
ماتوضه
الخطوة تسبيحه وصلاه
يسجد وتسجد عصاه
وأده فرضه
يرتل آيات الوداع
امسافر وحزنه المتاع
مايرفضه
فاگد إخوان وعمام
ذبحـو اگباله الإمام
ومن يعوضه
علواه .. راعي الحميه لو صحت
علواه .. راعي الكفاله يلتفت
بلكن ايشوفه ويكف سوطه الشمر
منحني وصاير مخيم عالخدر
__________________________
إيصيح يازينب سلام
ابلونچ ارماد الخيام
اشما لمحته
صوتچ الدافي الحنين
أسمع تغير وأسمع ونين
أشما سمعته
وانه خجلان من أجيچ
الحيل ياكل بديچ
وماگطعته
والشمر رمحه اعتناچ
وانه اباوعله من اجاچ
وما دفعته
سلامات .. ها يلبقيتي من هلي
سلامات .. ها يـالتناديني علي
وعاشت وياچ الجروح من الزغر
منحني وصاير مخيم عالخدر
__________________________
يمشي ويسولف أمان
وعالظعن يمطر حنان
ويقره آيه
ايخاف لا يوگع يتيم
طفله تشتاگ وتهيم
ابلا درايه
صحره وعيون الذياب
جسره ماترحم حجاب
ابلا حمايه
يدري ضعنه ابلا كفيل
ماكو للكافل بديل
وماكو رايه
على الاه .. يحله ابعذاباته الشمع
على الآه .. يحله ابنياشينه الدمع
تخلص الظلمه ويشع نور الفجر
منحني وصاير مخيم عالخدر
__________________________
بالقصر ماعنده سيف
چان من يحچي اعله كيف
بس گتلهم
هنا وگف وهنا يزيد
هنا ملك وهنا عبيد
ترجم الهم
آنه ابن نهر الحياة
عمي ذل ماي الفرات
و باوع الهم
نظره بس چانت تگول
تشرح أبناء الاصول
وعار أصلهم
وعدناه .. عرش الضلاله ينهدم
وعدناه .. عرش الخيانه ينهزم
ينتهي الطاغي وعلمنه الينتصر
منحني وصاير مخيم عالخدر
__________________________
كلمات الشـاعر الذهبـي | احمـد الذهبـي
____________________
كتــآبةة Zahraa Al obaidi
لتحميل القصيدة mp3 .. اضغط هنا
رد مع اقتباس